Evgil Türker mahkele cali aykanoyutho du cameydan bı Turkiya

U rişono du federasyon da hudre Suryoye Evgil Türker bi maqıblonutho dsimo acme mahkele b’yarixutho calu maktbazabno du camo Suryoyo u mırle u qatro d’Turkiya şuwolo di demoqratoyutho di hirutho du maftahfemo u subwotho hrene.

Türker dıkmahke cali sbutho du Sayfo komır ahna camona latna jamaca b’Turkiya metul du camo şırşoyo di dukthona.

Bi maqıblonutho dsımla i dafo du nawlo demokrat haber camu Rişono d’Sudef mahkele calu maktabzabno du cameydan mu zabno qamoyo hol lu zabnano u kali cali nuqto catımto dkito dkıtyo i şato da 1915 u Sayfo.

Evgil Türker kmahke du camo Suryoyo u camo şırşoyo di dukthoyo dıkmote u maktbazabno la yawmotho qamoye dı rakiwo i mdinoyutho, u be bzabno u camo dhule mdinoyutho lıbrithoyo.

Bu mamleyde komır ahna latna jamaca u mazhab ahna camo qamoyona, elo kıtlan mazhabe mşahılfe bi mşihoyutho.

Ba şuwole dımşayıl calu sayfo Türker mırle u sayfo qtolğenzo dhawi bu zabno di mamlaxtho cothmanoyto bi mcadronutho da caşıryotho da kurdoye, u hathe sbutho ğalabe ulsoytoyo du camo Suryoyo lıktocela u qulnaqa gıdmathkarla u gıdsoyım hfitwotho bu yawmo dilonoyo dkıtle u sayfo. Mawxa klozım a hayle en Turkoye aw kurdoye dkıtlın zawco bu qtılğenzano mawdın ebe u tılbi şubqono mu cameydan laşan dmitacmır maktabzabno zalilo la dore dothın.

Hıdo ma nuqtotho hırene dıkali acla u leşono Suryoyo dı layto hul adyoma u lo hıdo madraşto bu leşono suryoyo bu athro d’Turkiya, mawxa u camo suryoyo kodıc mıjğıl elo kule latle qraye u kthawto bu leşoneyde, calu şuwolo da madraşyotho di Gozarto d’Bethnahrin dımşarele dmitaqre u leşono suryoyo Turker komır latyo makıfyono u bu şıklano dımdawım kibe u leşono suryoyo mıqşıc me britho awkith kito qento calu dactid dide.

U rişono d’Sudef Evgil Türker kmahke cali sınca dkıtwole u camo Suryoyo u hule mathlo u telkari u mırle kito mathle sagiye ma sıncat da idothe dkıtweyne camu camo Suryoyo .

Bhaq du şuwolo mın qatre kcayşi a Suryoye b’Turkiya Turker mırle u cameydanste xıda came hrene dıkhoyın harke kıtlın qatre bi sbutho da zedqe noşoye, bi xasra di demoqratoyutho du maftah femo di kinutho u xıdani sıbwotho ğalabe.

Bhaq di şıltonutho dkıtyo ucdo Türker mırle mhalaqla dawsat dıha kibe hoşawlın hul li şato da 2010, bu zabnano a socuruwotho du cameydan zayidiwo wu camo d’Turkiya mşarewole dhowele sabro di ctidutho elo bıthır işıltonutho nafiqo mu darbo u mşarela ba hbose u ba dyoşe dhowın cala came mathlo u a mulkone di dayro u xıdani sıbwotho mşahılfe.