Fatıryarxo mor Louis Sako mqadamle 3 renye leşan bi sbutho da zedqe da qalilwotho wu dactidaththe bi Beth Nahrin

BOGHDOD — I qadişutho du fatıryarxo di cito Kaldoyto bu Ciraq ubıbritho kardenal Mor Louis Rofael Qadmoyo Sako, mıstaqbele athmıl bu qentrunayde u fatıryarxoyo bı Boğdod i mdabronitho du şutoso d’Yazsa Natia Navrozof cami taşdartayda. Bıthır mdıfris flim dekomentar calu haşo dcayşile a’Yezidoye bi fnitho d’Şigur bu garbiyo du Ciraq bi şato da 2014, drişo i aykanoyutho da qalilwotho wa zedqaththe bu haqlo athronoyo wu dactidaththe bu Ciraq bıthır ma rdufye dsimi aclaye ba 11 ışne dşaficina. 

Bıthır mathe, fatıryarxo Sako mqadamle tlotho renye laşan dhowın sebwotho du droşo bi ytawtathe. Bi qamayto i qadişuthayde mawdacle di aykanoyutho da qalilwotho umthoye u tawdithoye heş latyo mathınhonitho, mawxa ulsoyoyo ğalabe dmıflıh camıhdode laşan dmişatıs koalisyon la qalilwotho dkımdafıc a’zedqaththe. Bebzabno, Mor Luwis Sako grışle u zuhoro calu qento dmılhoyi a’gawne tawdithoye, umthoye u marduthoye bu Ciraq ida dımdawmo i aykanoyutho xıd dkıtyo ucdo dıkmıkboşi a’timoyotho wa zedqe da qalilwotho udkımdawmo i goluthaththe mu athro.

Camgabıdathe, i qadişuthayde mawdacle dıklozım dmisım hboso cali şultonutho du Ciraq laşan dmisım u sutoro da qalilwotho, udmişarrıro i kinutho udmısnodi a’qalilwotho lo ba wacde elo ba fulhone du praktik, u hathe ste bnişo dımdawmi a’qalilwotho dmıştacın u dawro dkıtwolın meqım bu şuşoto du athro. I qadişuthayde mawedacle ste du medano kibe dhowe b’gawıd d’athro di barmothoyutho, athro mdinoyo dıksoyım u sutoro da n’abnayde kulle lfuth u nomuso esonoyo. 

Bıthır mathe, drişi a’tlotho renyani wu fulhono mşawtfo bayn du fatıryarxutho Kaldoyto wu şutoso d’Yazda.