FBİ frısle i tahwitho ğnızto qamayto dcala hçome d’11 İlül

Yawmo bıthır ma zawhe dımtaybi bu duxrono şatonoyo d’11 İlül, frıslın a istixbarat d’Amerika FBİ i tahwitho ğnızto qamayto dcala hçomani dsimiwo calu athro ba 2001.

U taşrorano u qamoyano dfris u dkıtyo 16 fothotho, kibe u kunoşo du nuholo di maqıblonutho dsımwole FBİ ba 2015, cam gabro dkıtwole esore cam farsufe mi Scudiye, dımcadarwolın a marhıbone dhtıfwolın a tayosyotho leşan dcubri lıgawe d’Amerika.

Athmıl, mtayıb qatinto d’şetqo wu zawhe frişe leşan dmitathkıri an Amerikoye dqtiliwo meqım 20 eşne ma hçome dsımwole al Qacida cal Amerika ba 2001. B’Ground Zero-dkıtwın meqım a 2 burge tome, a yaqrotho da qtiloye saliqi u masırho u mawdaclın u ışmo du farsufo dqtılwo meqım 20 eşne.

La zawhe dsimi ba duktho dhçımwo aclaye-Manhattan, Pentagon u Shanksville b’Pensylvania mathkıri a 2977 dıbhe ula zawhani’ste, hadırile rişone frişe d’Amerika; beynothaye Joe Biden, George W Bush, Barak Obama u Bill Clinton. Camani’ste mqadım zmirotho me zamore idice u sim mamle frişe.

Adyawma’ste u tbocofroso Emwothoyo frısle i tahwitho ğnızto dımqadamlelın FBİ d’xlıqla zmomo. Hathe i tahwitho qamayto’yo dıkforıs FBİ bıthır mu amro dhuwole u rişono Biden leşan dmitagle cala tahwiyothani d’11 İlül u dmitahwe mkono lu camo dqorelın. Bi tahwithathe kito mawdconutho cali maqıblonutho dsımwo cam gabro dkıtwole esore cam farsufe di Scudiye dıkhoyanwo b’Amerika.

A farsufani’ste mcadarwolın a marhıbone dbıthır dhtıfwolın a tayosyotho, leşan dqudri dcubri l’Amerika meqım ma hçome. A ışmone da farsufani kulle du taşrorano dkıtyo 16 fothotho, mhe xtuto komo aclaye u heş kito ğalabe medone bu taşrorano dkıtne heş ğnize.

Ma 19 marhıbone-15 menaye barmothoye di Scudiye’wın elo ba 2004, wu komisyon da buhone d’11/9 mawdacwole dlayto ithbate beyn da marhıbone uda mşale di Scudiye. Elo u ahıl da dıbhe latne qanice li mawdconuthathe u kıbci-hınne dqorın u materila da taşrorani.