Ftiho i betharke d’Aşurbanipal b’Australia

B’Eden Venues b’Bonnyrigg dkıtyo b’Sidney d’Australia, sim zawho rabo lu futoho di Betharke dftiho bi fnitho. Lu zawhano du futoho hadırle hol 300 czime; beynothaye claymutho mu camaydan dmawdacla i fsihuthayda lu futoho di Betharkathe.

Ba mamle dsimi bu futoho di Betharke, mawdaclın’ste u sabro dkıtte du camaydan dqodır dımhafıd bu dactith’ste i marduthayde i Othuroyto ubebzabno, mahke cala fulhone dsimi hani zabno 6 yarhe dlo kıloyo leşan u futoho di betharkathe.

Ha ma mşale da sicotho du tuyobo di bethkarke mırle; Hani eşne u camaydan kıbone citotho u hudre-ucdo athi u zabno dmarkıwina betharke u dımşawşıtinalın. Bu zawhano, mfarıq’ste şukone lfarsufe frişe dhawilın tacbo bi tarmithathe uğer’ste dhuwlın ağono leşan u hefodo du leşono udi mardutho du camaydan.

U şorito du futoho di Betharke d’Aşubanipal, sim me abuna Raman Xamis, u rişono du Huyodo Othuroyo b’Australia dr. Ben Dawoud wu rişono di betharke Ramsen Warda. Bıgawe di betharkathe, kito kthowe d’kathowe idice du camaydan; beynothaye mhasyo Benyamin Gandelov dfrısle ğalabe kthowe calu makthabzabno du camaydan.