29/07/2025

Geir Pedersen: en ğrobe xıd QASAD dmiqadame xıd muttafik bu bnoyo d’Suriya, kito gado rabo lu huyodo ulu şlomo bu athro

U mathlono dilonoyo d’Emwotho Mhaydotho b’Suriya Geir Pedersen sımle mamlo bu Mawtbo di Mşaynutho d’Emwotho Mhaydotho cali aykanoyutho harayto d’Suriya. Bu mamlayde Pedersen kali cala taxtuşe haroye dhawın wa hçome dsımla İsroyel b’Suriya m’akadleste, da hayle d’QASAD kıtte dawro ulsoyo bu şekolo du dactith folitiqoyo d’Suriya.

29/07/2025

NEW YORK — U mathlono d’Emwotho Mhaydotho b’Suriya Gier Piedersen bu mamlayde bu Mawtbo di Mşaynutho d’Emwotho Mhaydotho b’New York mawdacle, du cnufyo haroyo dhawi beyn da hayle frişe b’Sweda u acmaye a hçome dmaqşela İsroyel cali fnitho, mhelın dharbo la fulhone dıkmisomi leşan u şuhlofo b’Suriya.

Pedersen mırle; U cnufyo dhawi bu yarhano u haroyo, mharhazle u şuhlofo b’Suriya ubu cnufyano, dişi a qonune Emwothoye, qtil mınyono celoyo dıbnaynoşo u hawi mudaxalat baroye. Elo camathe’ste naqla hreto mahwe snodo Emwothoyo lu qyomo d’10 Odor dımde’wo beyn di şultonutho d’Darımsuq uda Haylawotho d’Suriya Demoqratoyto dıkmısnodi me Amerika.

U nişo du qyomano, dhowe mlahmonutho beyn da hayle du garbay madınho d’Suriya ba şutose ruşmoye, dmi’amni a zedqe nomusoye da qalilotho du athro kulle u dmitarkıw şalyuthzayno bu athro kule. Calathe u qyomano kıtle ulsoyutho rabtho leşan u şuhlofo b’Suriya, elo ba droşe haroye dhawın b’Fransa, lo safın a qetre dbeyn QASAD u d’Darımsuq u kmıntır cal qariwo dmisım lqyoto hreto b’Paris.

Bu mamlayde Pedersen m’akadle calu dawro rabo u ulsoyo dhawile QASAD bu ağuno mqabıl d’Dacış uda haylani mıdlın snodo u mawdyonutho mu kenşo Emwothoyo calu şıkıl di mdabronutho dsımle u dıkmhafıd a zedqe da qalilotho du athro kulle. A haylani d’QASAD kıtulbi garanti nomusoyo du hefodo kamilo du garbay madınho d’Suriya uda camayde kulle. Pedersen bu huthomo mırle; En ğrobe xıd QASAD dmiqadame xıd muttafik bu bnoyo d’Suriya, kito gado rabo lu huyodo ulu şlomo bu athro.