04/03/2021

Ha farsufo hçımle calu camo u mçarahle 7 farsufe bu Swed

Farsufo d’22 eşne ume Afğanistan, hçımle bi skino calu camo b’Vetlanda dkıtyo bu qlimo d’Jönköping du Swed u mçarahle şawco farsufe.

 Bi mudaxala dsımle u polis Swedoyo, mçarahle u thimoyo u msıkle ma thome, dımnasele dqotıl mdinoye.

Adyawma u mqımdino mawdacle du thimoyano notarwo dmitahwele zedqo di galwoyutho bu Swed, msik ma thome dımnasele dqotıl camo. U thimoyano dhçımle athmıl bi skino calu camo b’Vetlanda bıgawe d’20 qatinotho mçarahle 7 farsufe ubi harayto, makle mu polis bıthır mıd mçarıh bu zayno u nqil bıthır li bethkrihe.

3 ma mdinoye dımçarhi, i aykanoyuthathe bu qento’yo, 2’ste mçarhi yaquro elo a hrene qaythlın belhude çurhe xayife bu hçomano dsim b’5 dukotho. U thimoyo heş me meqım’ste idico’yo mu polis ma hawbe da gelone mtanwone uba şoce d’casriye, sımle u polis cuqobo calu baytayde.

 Bi sbuthathe dımdaxelın a hayle di mşaynutho-Sepo camu polis Swedoyo, drişo i sbuthathe-en kito celtho di marhıbonutho bıthra, elo lo hiw detaje cala buhone dmabdın u heş lo sim buqore camu thimoyo. Bıthır me falge d’yawmo u mqımdino mawdacle, di sbuthathe mido ucdo li ido-xıd nesyuno du qatlo u latyo sbutho di marhıbonutho.

U rişwazire Stefan Löfven, u waziro di gawoyutho Mikael Damberg bı qaşyutho krıhlın u hçomano u mawdaclın u snodathe la yaqrotho da dıbhe. Bebzabno a rişone da gabe frişe du athro’ste, mahwelın u hfuxyathe u tlıble hulmono la mçarhe.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…