18/07/2025

Hawi hfuxye qaşye mqabıl du hçomo dsımla Isroyel calı cito da Latinoye b’Ğaza

I fatıryarxutho d’Urışlem da Rum Ortodoksoye krıhla u hçomo dsim cali cito da Latinoye b’Ğaza, u mawdacla dkıtyo dyoşo cjiqo lu neshono du barnoşo. Ubebzabno u Vatikan baroyo bıthır mu hçomo dsim cali cito, sımle qroyto msarhabto dmitakle u qrobo bu qlimo d’Ğaza. Camgabıdathe, i şultonutho d’İsroyel mıctarafla du hçomo dsim cali cito Qatholiqoyto d’Ğaza fawdo we. 

18/07/2025

GAZA, BRITHO — I fatıryarxutho d’Urışlem da Rum Ortodoksoye bu buyono dıfrısla, b’qaşyutho krıhla u hçomo dsim cali cito di İqartho Mqadaşto da Latinoye bi mditho d’Ğaza, udhawi celtho lu qatlo d’tlotho farsufe Mşihoye u menyono d’mçarhe u husrono rabo dhew lu benyono di marcitho. 

I fatıryarxutho bu buyonayda mırla “u hçomo cal duktho mqadaşto dıksaymo baytoyutho l’hedor d’600 galwoye di sagiyuthaththe nacime ul’54 farsufe hrene dkıtne mciqe, kmıhşu dyoşo cjiqo u qriho lu neshono du barnoşo, li qadişutho da haye, uli hırme da dukotho tawdithoye dıklozım dhowın bayto mşayno ba zabne du qrobo”.

Bebzabno, i qadişutho du papa du Vatikan Mor Leo da na’14 naqla hreto sımle qroyto dmitakle baroyo u qrobo bu qlimo d’Ğaza bıthır mu hçomo dsim cali cito Latinoyto. I qadişuthayde mahwele ste i hzinutho rabtho dkıtle cala debhe dnafili ucala farsufe dımçarhi bu hçomano. Papa Leo mawdacle ste dkıtyo ruhonoyith qariwo mu kohno di marcitho dımçarıh qaşişo Jubrael Romanelli uma n’abne di marcitho kulle. 

Camgabıdathe, u Qusro Heworo mawdacle du rişwazire d’İsroyel Bınyamen Netenyaho hule xabro lu rişono d’Amerika Donald Trump du hçomo dsim cali cito Qatholiqoyto b’Ğaza fawdo we. U makıthbo d’Netenyaho mawdacle ste d’İsroyel ktıcno ğamo rabo mu hçomo dsim cali cito, u mırle “u mede dhawi haşoyo”. 

Athmıl ste, sim u zawho du cufoyo da tlotho farsufe dıqtili bu hçomo dsim cali cito di İqartho Mqadaşto dkıtyo bi şawtho catıqto d’Alzaytun bu garbiyo du qlimo d’Ğaza, bi mıştawtfonutho d’rişone tawdithoye Mşihoye u hın ma comure d’Ğaza.