Hawi ytawyotho hathe beyn Suriya u Isroyel b’Paris

PARIS — U waziro di baroyutho d’Suriya Ascad Alşebani laqi athmıl bi erişkoyto dı Fransa bı Paris, taşdarto İsarloyto laşan dmıdrış menyono ma sebwotho dkıtlın asirutho cami aykanoyutho du taymno d’Suriya. 

Bi ytawtathe, mte l’awyutho dmitaqwın a’fulhone laşan dmitaxifo i mwatyutho folhoyto, udlımisım mudaxala ba sebwotho gawoye d’Suriya, udmısnodi a’fhome dkımcadri bu terkiwo di şalyutho ubu duyoqo di şalyuthzayno bi hiğmonutho d’Sweda. Bebzabno, a’tre gabe matın l’awyutho dmitafıt la haye u qyomo di şato da na’1974 bi sbutho di fnitho mşayanto cala thume bayn d’Suriya u İsroyel. 

A’droşe di ytawtathe simi bi mescoyutho d’Amerika ubu taro da fulhone deblomasi dıkmisomi, bnişo dmınfıq moro li mşaynutho uli şalyutho b’Suriya uli hdoyutho da n’arcothayda lfuth a’tebe dıfrisi bu ajans d’Sana. 

Bu tarano ste, i dafo d’Axiyos mawdacla di ytawtathe d’Parsi mıştawtaflela u waziro da sebwotho stratijikoye d’İsroyel Ron Dermer dkıtyo qariwo mu rişwazire Benyamen Netanyaho, wu waziro di baroyutho d’Suriya Ascad Alşebani wu mathlono dilonoyo d’Amerika Tomas Barrack. 

M’gabo hreno, u rişono ruhonoyo da Druz bu athro d’İsroyel şex Muwaffaq Tarif laqi athmıl bi mditho d’Paris, Tomas Barrack, u drışle acme i aykanoyutho ducdo du taymno d’Suriya. Li ytawtathe mıştawtafle ste u waziro catiqo bi şultonutho d’İsroyel Sale(h) Tarif dkıtyo bu şerşo Durzi. 

Şex Tarif bi maqırhonutho dıfrısle bi dafayde du facebook, mawdacle dıdrışle cam Barrack menyono d’nuqze cal Sweda, u tlıble dmithabto i şalyuthzayno b’şıkıl kamilo u aminoyo, udmıftıh koridor mşayno di naşfe, udmitahwe garanti m’Amerika laşan dmitacbıri a’mcadrınwotho l’Sweda. 

Tarif tlıble ste dmitaqım u ambargo mcali hiğmonutho d’Sweda, udmıflıh laşan du huroro da htifoye, udmitadcıri a’galwoye la qıryawotho da Druz dkıtne bu macırbo ubu garbiyo d’Sweda.