HBA frısle buyono dıkmhane ebe u gabo du Huyodo Suryoyo d’Suriya bi cohnutho du yawmo şatonoyo dan 16 eşneyde

U gabo du Huyodo d’Bethnahrin Athroyo, frısle buyono dıkmhane ebe u gabo du Huyodo Suryoyo bi cohnutho du yawmo şatonoyo dan 16 eşne du ağuno dkobe bu haqlo du tlobo da zedqe du cameydan.

HBA bu buyonayde komır; Kımhanenalxu ba fulhone folitiqoye, diplomatiqoye u folhoye dıksaymitu bu athro d’Suriya leşan i hirutho du cameydan.

 U buyono dfrısle u gabo du Huyodo d’Bethnahrin Athroyo kımşare ba melani. Bi qamayto kıkayfina rişayna qum da sohde du Mawtbo Folhoyo Suryoyo, wa sohde du gabo uda sohde du cameydan.

Kımhenena i mdabronutho du gabo wa hadome, bu yawmo şatonoyo di mşatsonutheyde u bebzabno kımhanena le dımkamele 16 eşne bi teşmeşto du cameydan u Othuroyo Suryoyo. HBA bu buyoneyde kımwasıf a teşmeşeyotho dsımle u gabo dGHS u wa şutuse dımşatasle.

Be bzabno u buyono komır; Kımhanenalxun cali mıştawtfonutho şarirto dhawile u gabo cami Mdabronutho yothoyto du garbyo u du madınho d’Suriya, bebzabno kmıştabhrina bi mıştawtafonuthathxu dcama Haylwotho d’Suriya Demoqaratoyto leşan dmiamni a dukotho dımharıri ma marhıbone d’Dacış.

HBA mırle; İ dbihuthnafşo dsımxu ftıhla safha hathto u nasihto bi umthonoyutho, bi ithutho ubi noşutho. Elayxu tahınyotho li dbihutho du nafşo dıksaymitu bu gabo di umthonoyutho, bi mothonoyutho ubi noşutho.