Hkimi a farsufe dıkmıthomi bu qatlo d’Xaşıqçi

U athro di Scudiye mıdle fusqono du hbuşyo bhaq d’8 farsufe dıkmıthomi bu qatlo du gelyunoro Jamal Xaşıqçi.

Megabo hreno, Turkiya hkımla 40 naqlat hbuşyo aminoyo bhaq du marıhbono dıqtiwole 39 farsufe bu hjomo mzayno dsımwole cal gazino bu lalyo di rişıdşato da 2017.

U bethdino di Scudiye athmıl mıdle fusqone du hbuşyo bayn 7 hul 20 ışne, mqabıl dı 8 farsufe dıthimi bi sbutho du qatlo du gelyunoro Jamal Xaşiqçi i şato da 2018 b’gawıd di izgadutho di Scudiye b’Stanbul.

Afusqonani du bethdino midi bıthır mdışbıqla i iqartho d’Xaşiqçi aqatolayde, u mawxaste lımid fusqone du icdam du qatlo bhaq da thimoye.

Hın mşale emwothoye u hfite bu haqlo da zedqe noşoye mawdaclın da farsufe dhulın u amro du qatlo d’Xaşıqçi heş hirene, elo u sniğro di iqartho d’Xaşiqçi bi maqırhonutho dhule li sferyawmo d’Alşarq Al Awsat, mawdacle di iqartho kımaydo afusqone du bethdino, u krığşi bi thnihutho.

Megabo hreno, u ajans da tebe d’Anadolu mawdacle du bethdino dı Turkiya hkımle athmıl 40 naqlat hbuşyo aminoyo bhaq du marıhbono Cabdılqader Maşaribov dıqtiwole 39 farsufe bu hjomo mzayno dsımwole cal gazino bu lalyo di rişıdşato da 2017 bi mditho d’Stanbul.

U bethdino Turkoyo mawdacleste dıhkımle cal Maşaribov dkıtyo mu athro d’Ozbakistan, 1368 ışne hrene hbuşyo, cal dıkmıthım dımnasele dqotıl 79 farsufe hrene, u cal dkıtwole zayno lo ruşmoyo.