20/01/2021

HNB frısle buyono bi ohnutho du fusqono dhule u Papa cala qonune di cito

 U Huyodo da Neşe d’Bethnahrin, frısle buyono calu fusqono hatho dmıdwole u Papa du Vatikan Mor Francis qadmoyo ba yawmotho dşafcina bi sbutho da qonune di cito.

Bu fusqonano huwo aftho la neşe, da citotho Qatholiqoyotho dmitasırhi şamışyotho b’darğo d’qoruyo u aşidyaqon. Bu buyonano HNB, kımqadım tahınyotho la neşe di cito Qatholiqoyto ula neşe du camaydan, calu ağono dhuwlın wi klaytathe mqabıl di lo kinutho dkıtwo mqabıl dıthe bi cito.

 İ qadişutho du Papa Mor Fransis Qadmoyo, huwle fsoso qonunoyo dmitasırho i athto l’şamışto b’darğo d’qoruyo u aşidyaqon, bnişo dmıştawtıfo hiyaste li mşablonutho du madhıbho. İ mşablonuthathe dhiwo li athto, latyo i mıcnayda da neşe kibe dmitasırhi kohne, cal di mşamşonutho di athto frıştoyo mi mşablonutho du gabro dıkmitahwele u rozo di kohnutho bu zabno di masırhonuthayde.

Calu fusqonano, u Huyodo da Neşe d’Bethnahrin frısle buyono u mırle; Cal ışme d’HNB komhanena i athto Qatoliqoyto dmatyo lu nişo du ağunayda dhani zabno kobo, leşan a zedqe di athto bu mathab Qatholiqoyo. Wu dilonoyith kımhanena a neşe du camaydan di cito Qatholiqoyto. A neşe wu şuşoto dsımlın, hawilın klayotho mqabıl dilo kinutho dhawyo mqabıl dıthe.

Bi tawditho Mşihoyto, hawila i athto dawro rabo bu nqolayda lğer dukotho u mahıtla ruha xıd ğenso bi Mşihoyutho. Kıtwola dawro bu kenşo u dilonoyith b’darğo da şlihe elo camıhbol, kmitankır bıthır u ğenso di athto bkul duktho di tawditho u kmılhe u darğayda lfalge d’barnoşo. Mınyono d’neşe qayimi li rağlo leşan dmaqimi u tenkiro di athto bi tawditho Mşihoyto dilonoyith bi cito Qatholiqoyto. A neşe qrelın theoloğiya elo naqla hreto lo hiw eleye duktho bi cito.

HNB mırle; Kımhanena a neşe dmatın lu zedqano bıthır mu şuhlofo dsımle u Vatikan bi cito wu fusqonano, dawse makthabzabnoytoyo la neşe u lu kenşo u dawse demoqratiqoytoyo u di şawyuthoyo. Ahna xıd huyodo da neşe, kmıtyaqnina di duktho dkito athto, kitoste haye, hubo u şlomo u hirutho. U şuşotano dhawi bi cito Qatholiqoyto, mathloyo lu mazhab Orthodoksoytoste wa şuşotani, kımamtın şayno u şlomo li noşutho kula.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…