İ karxutho d’İtalya mtayabla turgomo lu snodo di Mdabronutho yothoyto

Bi mdito d’Frense bu athro d’İtalya, mtayıb lumodo leşan u snodo di Mdabronutho yothoyto du garbiyo udu madınho d’Suriya.

 Bu lumodano, a mıştawtfone mawdaclın di Mdabronutho yothoyto mathlo di hirutho du kenşo d’Urifi’yo, ube bzabno sımlın qroyto li şultonutho d’İtalya dmakılyo a qyome folhoye udi tagorutho dkıtla cami şultonutho d’Turkiya.

 U rişono di karxutho d’Kalensano d’İtalya Riccardo Prestini, bı qaşyutho krıhle a hçome dıksoyım u gayso kaboşo d’Turkiya cala fenyotho du garbiyo udu madınho d’Suriya, ube bzabno m’akadle dıklozım dmitakılyo i bceldbobutho d’Turkiya mqabıl da came di fnitho.

U mamlo d’Prestini athi luhwoyo bu lumodo dımtayıb ba yawmotho dı şafıcina bi karxutho d’Kalensano d’Frense b’İtalya, bnişo dmiqadım snodo li Mdabronutho yothoyto du garbiyo udu madınho d’Suriya. Bu mamlayde Prestini mawdacle di karxuthayde, gıdmdawmo u snodo da came du garbiyo udu madınho d’Suriya, u sımle qroyto li şultonutho d’Ankara, dmakılyo a hçome lo qonunoye dıksaymo cala fenyotho di Mdabronutho yothoyto.

Me gabo hreno, u hadomo bi mdabronutho di tahbartho İtaloyto d’ARCI Manfreddi Sawro bu mamlo dsımle bu lumodano mwasafle u sistem demoqratoyo konfedraloyo di Mdabronutho yothoyto u mawdacle, du sistemano mathlo du huroro du kenşo d’Urifi’yo. Sawro mırle’ste; Klozım dımdafcina u sistem di Mdabronutho yothoyto, u dlo trenale fako lu diktator Erdoğan ula grubayde a marıhbone.

Sawro sımle’ste qroyto li şultonutho d’İtalya, dmakılyo a qyome folhoye udi tagorutho dkıtla cami şultonutho d’Turkiya. Mxasra hreto, u rişono du Sahro Semoqo d’İtalya Alijan Yıldız bu mamlo dsımle mawdacle di şultonutho d’Ankara sımla hçome cala botaykrihe, cala madraşyotho ucalu benyono tahtoyo da fenyotho du garbiyo udu madınho d’Suriya.

Yıldız dmawdacle dhol 400 alfo farsufe çbiri dımgalwın ma botaththe, krıhle’ste u qedomo da şultonwotho du  macırbo dhulucdo lo mbayanlın i klaytathe bi sbutho di barbroyutho dıksaymo Turkiya cala fenyotho du garbiyo udu madınho d’Suriya.