Rişono Trump mawdacle u renyeyde laşan i lohitho di butja athronoyto
U rişono d’Amerika Donald Trump, mawdacle u renyo leşan i lohitho di butja athronoyto hathto di şato da 2021. Li butjathe dımbayno li şato dıbqamuthayna, friş 4.8 milyare dolare.
U rişono Amerikoyo kobıc bi butjathe, dmanqıs i mcadronutho dkobe lğer athrawotho u dmaqwe u haylo nukleer d’Amerika.
U Qusro Heworo mawdacle u renyo du talab dkıtle leşan i butja hathto da 2021, meqım dımşarın a guboye di rişonutho du athro. Mawdıc du talab dkito leşan i butje di şato dothe, 4.8 milyare’yo u mqadmo li kongre d’Amerika leşan dım’aydola. İ butjathe, kmıntır dfutho qum Trump dımdawım dawro hreno xıd rişono du athro.
Bi sbutho di siyase du sutoro udi wazirutho di baroyutho, Trump naqla hreto mahwele dkobıc dmaqwe u haqlo folhoyo. Calathe friş 28.9 milyare leşan u şuşoto u hethotho da zayne nukleer. Gıdmitacle u mcaş da folhe u gıdmişawşıt u teknikathe ulu şuşoto da hayle folhoye du Athir.
Trump kımahwe lo harıwle ğalabe cala qente di mşaynutho, cali sbutho du hulmono uğer. Mawdıc di şultonutho d’Trump hani zabno yarixo, saqıbloyto’wa lu snodo dan athrawotho hrene. Meqım şato abıc’wo dı qotıc 4 milyare mi Daira Amerikoyto-USAİD umi wazirutho di baroyutho.
Lfuth Trump, a zuze du camo klozım dmitıstacmıli lu yuthrono du athro ulo snodo dğer athrawotho ulu şroyo da qetrathe. Bi butçe hathto, kobıc Trump dmanqıs u snodo lu haqlo di mşaynutho athronoyto udi mcadronutho dıkmitahwıyo lğer athrawotho u dmacle u snodo la hayle di mşaynutho wu mcaş da folhe catiqe. Friş 2 milyare’ste lu bnoyo du şuro lafu athro d’Mexiko.