İ marcitho d’İllinois macbarla u yulfono dcalu qtolğenso dsımwo calu camaydan ban 1915, bi tahrazto du yulfono ba madırşothayda du gymnasium

SPRINGFIELD, Amerika – Bi maqırhonutho dfrısla i daira du yulfono di marcitho d’İllinois d’Amerika maglela, dkıtla şubhoro dmawdıco ruşmoyith dfsıqla hiyaste bıthır mi marcitho d’Arizona, dmahto i sbutho du qtolğenso dsımwo calu camaydan bi tahrazto du yulfono da yolufe, dıkqorın ba madırşotho du gymnasium di marcitho. Arizona mahıtwola I sbutho du Sayfo bi tahrazto du yulfono da madırşothayda 10 bu yarho d’Ob da 2024.

İ tahrazto du şuşoto du yulfonano dcalu qtolğenso b’İllinois, mşawşıto me dr Erin Hagis u professor Hannibal Travis. İ daira-Illinois State Board of Education mırla; Kıtlan şubhoro dmawdcina, dımhalaqlan ahnaste i dawsathe du yulfono dcalu qtolğenso dsımwo calu camo Othuroyo bu zabno du qrobo qamoyo dbritho, leşan dmidoco i şrorutho du makthabzabno catumano b’britho u dhowe mawdyonutho kamılto ebe. 

İ daira du yulfono kımawdıco; İ marcithathe kobo yasifutho rabtho lu yulfono dcalu Holocaust ucala qtolğense dsimi wu ucdo’ste, gıdmitahwe mkono dmitarwıh u yulfonano cal ğer qtolğense hrene dsimi; beynothaye du camo Othuroyo. Ucdo kıtlan şartat u yulfono makfıyono, leşan dmitaqre ba madırşothaydan calu qtolğenso dsımwo calan Othuroye bi şato dan 1915.

İ marcitho drışwola i sbuthathe bi tahrazto di şato yulfonoyto da 2024-2025, bnişo dmitahwe yulfono la yolufe tawtır dfuhmi u mede dhawi kule bu makthabzabno, a celotho du qtolğenso wu tathir dtrele bıthır u gunhano calu camaydan. U fusqonano mid, bıthır şato d’droşo yarixo dkıtyo falqo du inisyativ dkito, leşan dmitıctarıf ebe uba qtolğense hrene dhawın b’britho.