I marcitho d’Mississippi d’Amerika mawdela bu qtolğenso calu camo Armınoyo

İ marcitho d’Mississippi hawyo i marcitho da 50 d’Amerika, dıkmawdıyo bu qtolğenso dsim calu camo Armınoyo ban 1915. U rişono di marcitho Tate Reeves sımle iclan u yarho d’Nison-yawmo du duxrono u tekliyo qum du tuyobo da qtolğense.

Bi maqırhonutho di rmoytathe dmaqbılo bi marcitho, bşıkıl rwiho mahke calu qtolğenso dsımwola i mamlaxtho da Cuthmanoye cal milyon u falge d’sobe, neşe, gabre, tloye cal dkıtwın Armınoye uba mo alfayo dhrene, d’jbiri dmahzımi ma dukothathe beyn da eşne 1915-1923.

Me gabo hreno, i sfaryawmo d’Arjantin-dkıtyo ha man athrawotho dmawdele bu qtolğenso dan 1915, frısla mimartho cal Turkiya dkıtyo hadımto bu NATO u dheş hol adyawma, kımdawmo dmankıro a hawbe barbroye dsımwola bu zabno du qrobo qamoyo dbritho.

İ sfaryawmo d’La Nacion mawdacla, u tenkiro du qtolğensano-klozım dhuwyo qroyto du tehiso dan athrawotho hadome bu NATO cal Turkiya. Bi mimarthathe i sfaryawmo mahkela cala hawbe sistematik dsimiwo calu camo Armınoyo u Ankara kımdawmo d’rufdo i mşaluthayda bu qtolğensano.

La Nacion grışla’ste u zuhoro cali socurutho dsımwole u waziro di baroyutho d’Turkiya Mevlut Çavuşoğlu l’Uruguay u dsımwole b’sawcothe u remzo da Turkoye tuhmonoye qaşye da Bozkurt qum du camo Armınoyo dlayımwo l’taglitho mqabıl dide.