İ ositho Suryoyto Miden Malle Hannah qmırla şukono b’New York calu fulhono dıkmaşyo cali ale dxlıqla mqabıl du kewo du kanser da kıllaw

JONKOPING / NEW YORK – Dr Miden Malle Hannah dkıtyo cımra 46 eşne, qayimo b’Jönköping du Swed wi bartho di kathıwto Anna Malle’yo. Miden Malle, ositho du urologi’yo awkith da kewe qaşye-xıdu kanser dkowe ba kıllaw, bu kiso ubi borriye di mazraqto’yo. İ Miden kıtla sebyono qawyo ubu şuğlo dıkmaşyo, frışla’ste zabno dımqafyo alternativ-darbo leşan u şuşoto du tedawi du kanser. Bıthır eşne d’buhone, xlıqwola i Miden wu ğrob dkıtyo acma ba 2017, teknoloji hatho dıkmidıc bu ışmo d’Multi4.

U teknolojiano kıxolıq tedawi automatik mqabıl du şıkıl du kanser bu bayto da maye du kayiwo. U tedawi mqabıl du kanserano bu normal ğalabe timo’yo la bethkrihe u b’Amerika, kmıjbır u kayiwo dobe 140 alfo dolare. Bu metod di ositho Miden, u kayiwo lıklozım dnotır ba yarhe elo i camaliye kmisomo xayifo, dlo ntoro u dlo timo celoyo.

Calu şıkıl du teknolojiano dxlıqla i Midın ale dilonoyto lu kayiwo du kanser, u şutosayda d’Multi4 Medical, mdaşın şukone frişe u adşato’ste mıdla i Miden duktho beyn da 9 şutose dqmırlın u şukono-İnnovate Nordics Acceleration Program 2025 Cohort mu tukoso The Swedish-American Chamber of Commerce, b’New York-awkith i Qeloyto di Tagorutho Swedoyto Amerikoyto, dkıtyo tukoso dıkmişakıl me 19 şutose frişe.