İ qale beyn Al Asad u d’Rami Makhlouf Kımdawmo

U maşıqlo du fırfoso di şabake momunoyto du abro du holo du rişathro d’Suriya Rami Maxluf, kımdawmo. 

İ şultonutho d’Darımsuq ba tedbire haroye dmıdla mqabıl d’Maxluf, mahıtla ido cala sahme dkıtle b’12 bankat u şutose momunoye b’Suriya.

 İ wazirutho du momuno di şultonutho d’Darımsuq, athmıl mahıtla ido cala sahme dkıtle Rami Maxluf b’12 bankat u şutose momunoye dilonoye b’Suriya; beynothaye u bank d’Code, u bank d’Biblos, u bank Caraboyo u Frans bank.

İ dawsathe dımhalqola i şultonutho d’Darımsuq, kmıhşowo tedbir hatho mqabıl du moro da şuğlone rabe d’Suriya Maxluf, bnişo dmifarfıso i şabake momunoyto dıkmadırla bıgawe du athro.

Be bzabno u fusqonano athi luhwoyo, bıthır mıd lo makşarlın a bazare dsımiwo yawme d’tre dşaficina, beyn da hadome di iqartho d’al Asad udı Maxluf u dımtaybiwo bu qusro du abro du holo du rişathro d’Suriya Rami Maxluf dkıtyo bi qastra d’Yacfur qariwo l’Darımsuq.

Bi ytawtathe da bazare, tlıbwo me Maxluf dtore mi şırke da telefone d’Siryatel leşan dmitahwın lu sanduqo da sohde, u tlıbwo’ste mene dmadcır lu athro falqo rabo ma zuze dkıtle ba banqat dlarwal u dıkmotın l’mılyare d’dolare, bnişo dımcadri bu şroyo du kriz momunoyo rabo d’Suriya.

Camgabıdathe, a tedbire haroye dmidi mqabıl d’Maxluf kımathli funoyo lu fusqono dmıdwola i wazirutho du momuno dmitahıt ido cala zuze ucala mulkone kulle dkıtle Maxluf udi iqarthayde.