İ şultonutho d’Erbil hawila ytawto camu rişızgado d’Amerika bı Boğdod

İ şultonutho du qlimo d’Kurdistan du Iraq, mawdacla da Kurdoye gıdhowın tırpılto b’qamuthıd du şekolo di şultonutho Iraqoyto hathto.

İ mawdconuthathe hiwo bu zabno di ytawto dhawila adyawma taşdarto mi şultonutho du qlimo d’Kurdistan camu rişızgado d’Amerika bı Boğdod Mathyo Toller.

U mcadrono du rişono di şultonutho du qlimo d’Kurdistan du Iraq Qubad Talbani cami taşdartayde laqi adyawma bi mditho d’Boğdod, u rişızgado Amerikoyo bu Iraq Mathyo Toller.

Bi ytawtathe a’sebwothani drişi: a’tedbire du nfoqo mqabıl du virus d’Corona, aqetre dkito bayn di şultonutho d’Arbil wi şultonutho qentrunoyto d’Boğdod wu şekolo di şultonutho hathto du Iraq.

U rişono di taşdarto du qlimo d’Kurdistan bu mamlo dsımle bi ytawtathe, mawdacle di socuruthayde l’Boğdod kıtla u nişo dmatimo a qetre bayn da tarte şultınwotho d’Arbil ud’Boğdod, bu taro du nomuso esonoyo du Iraq uda qyome dımdınwo meqım bayn da tıre gabe.

Cali sbutho du şekolo di şultonutho hathto du Iraq bi rişonutho d’Mustafa Alkazimi, u rişono di taşdarto Kurdoyto Qubad Talbani mırle “a’Kurdoye lıgıdhowın tırpılto b’qamuthıd du şekolo di şultonutho Iraqoyto federaloyto, elo gıdhowın falqo mu şroyo bnişo dmitaqwiyo i şalyutho, udmitahwe aftho lu şroyo da qetre dzayidi bayn Arbil u Boğdod, udmişawşıti anesore bayn da tıre gabe”.