22/07/2025

İran u Urifi gidmadin droşe calu nukler b’Stanbul. Trump hadiroyo dsoyım hçome hathe calu nukler İranoyo

U rişono d’Amerika Donald Trump mawdacle dhadiroyo dsoyım hçome hathe cala şutose İranoye du nukler ida dlozım. Trump naqla hreto makadle da hçome Amerikoye dsimi calu İran shıflın a’macımle wa nuqazyotho du nukler.

22/07/2025

BRITHO — Trump bi maqırhonutho dıfrısle bi dafo dı Truth Soşial hawxa kthule “u waziro di baroyutho Cabbas Caraqçi kımbahıs cala şutose du nukler du İran. A’husrone ğalabe rabe ne. shifi. Men kulfrus u medanoyo dmırli… u gıdımkararnole in dlozım”. 

Trump mawdacle di tahrazto İranoyto du nukler hzela husrono rabo, u mathkarle ste da şutose du tboco froso dhawilın keşlo bu haylo dkıtwolın a’hçome Amerikoye klozım dıtılbi şubqono. 

U gzomano dı Trump athi luhwoyo bıthır mi maqırhonutho dhule Caraqçi lu froshezwo d’Amerika Fox News. Caraqçi bi maqırhonuthayde mıctarafle di tahrazto İranoyto du nukler ucdo klithoyo mi celtho du husrono rabo dqayıthla bi netiçe da hçome dsımla İsroyel u Amerika. 

Caraqçi makadle ste du athrayde lıgıdtore ma fulhone du şuşoto du Uranyom, u mawdacle du athrayde latyo hadiro ucdo dmabde bazare baroye cam Amerika bi sbutho di tahrazto du nukler. 

Bi sbuthathe, Caraqçi mırle ste “ahna ftihena la bazare, elo lo la bazare baroye. Ahna hadirena li methcadronutho”.