İsbutho du bethdino du dayroyo Aho Bilecen nqilo lu komisyon du Huyodo d’Urifi

İ sbutho du bethdino du dayroyo Aho Bilecen di dayro d’Mor Yakub d’Qarne, nqilo lu komisyon du Huyodo d’Urifi.

Bi sbuthathe bu funoyo dhuwle u mşalo da esore baroye du Huyodo d’Urifi Josef Borell la şuwole da qoyume Hollandoye mırle; İ dişutho dcala Suryoye b’Turkiya zayido bu zabnano di Corona.

Bi sbutho du bethdino lo kino mqabıl du dayroyo di cito Suryoyto Orthuduksoyto Abuna Dayroyo Ahe Bielcen, 4 qoyume d’Hollanda mşadarlın egartho d’şuwole lu mşalo da esore baroye du Huyodo d’Urifi Josef Borel dkubci funoyo aclaye.

A qoyumani dkıtne me gabe mşahılfe Peter van Dalen, Esther de Lange, Annie Schreijer-Pierik u Bert-Jan Ruissen, bi egartho dımşadarlın kımşayli u mşalo, en gıdsoyım hboso cal Turkiya bi sbuthathe du dayroyo dlatyo tristo, aw lo.

A qoyumani dkıtne bu parlemento d’Urifi bi egarthathe kımmi; U dayroyo lo sımle mede larwal mu qonuno, mawxa u mede dsim mqabıl dide-darbo mqabıl da zedqe noşoye’yo, da qonuno di demoqaratoyutho u mqabıl da zedqe da came qalilotho dlatte sutoro’yo.

Bu funoyo dhule Borell mawdacle d’sımle socurutho li dayro d’Mor Gabriel dıktucno i mşalutho du dayroyo Aho Bilecen. Elo bhaq di socurutho lo mahkele mede, u mırle; Bu zabnano u haroyo a citotho wu camo Suryoyo kfayti me casqutho rabtho, u bıthır mi Corona umu qrobo d’Suriya zayido i casqutho zıttır.

Borell bu funoyayde mırle; A hadome du komisyon d’Urifi kıtucni ğamo rabo cali sbutho da zedqe noşoye udi kinutho, ba esoreydan dcam Turkiya u hani kmitamtın li tablitho du droşo. Bıthır mu funoyano dhiw la qoyume du parlamento d’Urifi mu athro d’Hollanda tlıblın dmidawım dmıdroşo i dişutho dkowe cala Suryoye.