02/08/2025

İşoc Gawriye: i şultonutho di Ahmed al Şarıc kibco mdabro Kul-Suriya bu şıkıl dımdabrowa Idlıb. Calathe a şwole kull dkothe kızaydi u lıknuqsi

Bi tahrazto hathto dfriso athmıl bu froshezwo d’Suroyotv, griş u zuhoro calu maşıqlo folitiqoyo haroyo d’Suriya, wi ntarto dkıtwo mi şultonutho hathto d’Darımsuq lu bnoyo d’dactith hatho cama came frişe dıkhoyın bu athro. Bi tahraztathe d’Sbuthan, İşoc Gawriye dkıtyo mi Sictho di Rişonutho du Mawtbo Umthoyo d’Bethnahrin, bşıkıl rwiho mahkele calu ağono ucali dbihuthnafşo dhuwlın a şutose frişe d’MUB b’Suriya, leşan a zedqe wi ithutho du camaydan.

02/08/2025

SURIYA — İ tahrazto d’Sbuthan dıkmiqadmo me Şleymun Rhawi, fris athmıl u fosuqayda u qamoyo b’Suroyo TV cala şuşote ucali aykanoyutho harayto d’Suriya. Wu xıd dayfo qamoyo li tahraztathe dgımıfroso b’dafe frişe du nawlo, maczım İşoc Gawriye mi Sictho di Rişonutho d’MUB u sımle u nuholo du maşıqlanou u kali siyase dmaşele u Bacth wu şıkıl di şaxsiye u psykoloji dxlıqle, u kboşo d’Dacış udu Gbino d’al Nusra cal dukotho frişe du camaydan b’Suriya wu ağono dhuwlın a hayle folhoye du camaydan dlo zuctho ubı dbihuthnafşo rabtho dhiwo, leşan dmi’hame u athro dan abohotho.

Gawriye mdawamle u mamlayde calu nfolo du rejim catiqo wu sabro dkıtwo bu şuroyo, mi şultonutho hathto d’Ahmed al Şarıc wi ntarto dkıtwo mi şultonuthathe dfutho qum da qalilotho uda came etnikoye u tawdithoye du athro bu maşıqlo folitiqoyo hatho d’Suriya. Elo hawi qedomo terz u maşe cnufyo u hçome barbroye cala dukotho du camaydan, cala dukotho du sforyamo ubi haraytathe’ste cala Druz d’Sweda u qtil alfayo dıbanynoşo. Awkith hathe kımadilo, di şultonutho d’al Şarıc lo qadiro dhuwyo şultonutho cal Suriya kula.

Bu şıkıl dımdabrowa Idlıb, mıftakro’wa dkiba dsaymo cayni mede bu athro kule ubu dumyano’ste, kımdawmi a hbose cala qalilotho d’Suriya ulo huzyo i sniqutho da bnaymothoye kulle. Gawriye mkararle i qroyto dsımwole u rişono gawonoyo d’MUB Nacim Michael Hadodo cali ulsoyutho du huyodo du camaydan mırle; Kito tathire du qlimo u siyasat nuxroye-xıd Amerika, Turkiya uğer cal Suriya u calathe, heş latyo idico Suriya layko’yo azılto wa şwole kull dkothe kızaydi u lıknuqsi.

İşoc Gawriye komır; Ahna xıd camo ba gabe u şutosayde-folitiqoye, marduthoye, tawdithoye kulle camhıdode, kiban dhudnina i fırsathe leşan u huyodo du athro udu camaydan uda Mşihoye b’Suriya kula-xıdu Wadi uğer dukotho wu gawonoyith du Madınho Mescoyo. Bu tarano mşatıs u Mawtbo Mothonoyo d’Madınho b’Suriya bnişo dmihaydi a fulhonathe b’haqle frişe fa haye. Bebzabno Gawriye bu huthomo kali’ste cali mahisutho ucali mşalutho dıknuflo calu camaydan di golutho aydarbo kibe dnofıq moro li sbutho da talabe uda zedqe du camaydan bu athro.