İsroyel hula amro l’50 alfo folhe yedek dımqaydi ruhaye leşan dmaydi duktho bu cuqobo d’Ğaza

URISHALEM — Malolo di şultonutho d’Tel Aviv mawdacle, d’rfıde u renyo hatho dımqadım bnişo dmitarkıw 60 yawme şalyuthzayno camu zawco d’Hamas. U renyano dmaqbıl mu zawco Fleştoyo, kıhobış’ste bıgawe u terfiyo da htife dkıtne ba haye aw mithe uda yasire Fleştoye dkıtne ba hbuşye d’İsroyel.

Bebzabno kmıtlıb bu renyano, d’İsroyel dgurşo ruha me dukotho d’Ğaza u dmitacbır mcadronutho msarhabto la mdinoye. Elo lfuth u tebo dfris bu tbocofroso d’İsroyel, Tel Aviv rfıdla u renyano wu waziro du sutoro İsrael Katz m’ayadle u plan dımqadamla i şultonutho leşan u kboşo d’Ğaza.

Calu planano dmahwe hfuxye qaşye mqabıl dide, adyawma mşadır amro lba casro alfayo d’folhe d’yedek dımqaydi ruhaye leşan dmitafıto i tahraztathe la haye. Lfuth u plan dımbayın, u gayso gıdnoqıl hol milyon dıbnaynoşo lğer dukotho du taymno du athro meqım me 7 Teşrin u qamoyo-dkıtyo u yawmo şatonoyo da hçome d’Hamas cal İsroyel.

Tel Aviv kımawdıco, dmarkawla bu taymno du athro duktho la Fleştoyani d’Ğaza. Bu dumyano mahıt zabno d’2 şabe qum da folhani dımqaydi ruhaye leşan dmitafito Ğaza lu duyoqo d’İsroyel. Elo a folhani kulle, lıgmaydi duktho bi hamlathe. Sahmo ma folhani, gıdmaydi duktho da folhe hrene dkıte b’dukotho frişe d’Ğaza