Jamil Bayıq: ktılbina dmitawfıq qonuno di hirutho udi demoqratoyutho la came kulle

QANDIL, Beth Nahrin — Bi maqıblonutho dsimo acme m’sferyawmo dkıtyo qaruto mu gabo di PKK, u rişono zawgoyo du tukoso du kenşo d’Kurdistan di KCK Jamil Bayıq mawdacle laşan du maşıqlo du şlomo b’Turkiya dımhalıx laf qudmo, klozım dmitarfe Abdulla Öçalan, dmi’amni a’şartat du fulhonayde, udmitaqım u izilasyon du hbuşyo d’İmrali. 

Bayıq dım’akadle d’Öçalan wi PKK dsımlım i wolithaththe lafu camo mırle ste “i şultonutho dı Turkiya maxıfla ışmo u izilasyon, ukımnasyo dmahwiyo lqul di cayno dmaqımla mi holo. Hul dkımdawım u izilasyon laybe dmihalıq dawsat hathe”. 

U rişono zawgoyo di KCK grışle ste u zuhoro cala dawsat dıknofalwo aclaye dımhalqiwolın, u mawdacle d’athi ucdo u zabno laşan di şultonutho dı Turkiya dımhalqo a’dawsatayda, uhawxa mdawamle “lıffayış dawsat dıklozım dmihalqi mi xasraydan, u ahna knıtrina a’dawsat dı Turkiya udi şultonutho”. 

Bebzabno, Bayıq mahkele cali hzayto dkıtle mi maqırhonutho haryato dhule u rişqutno dı Turkiya Erdoğan u mırle “u mamlo d’Erdoğan kıtwo ebe nuqze msimone, elo lule u funoyo dıkmıntarwo lu maşıqlo. U hçomo ste dsim calu gabo di CHP nesyunoyo dmitahru u maşıqlo du şlomo”. 

Cali sbutho da talabe dkıtlın m’Turkiya, Bayıq mırle “ahna lıktılbina dmitawfıq qonuno du şbuqyo, elo ktılbina dmitawfıq qonuno di hirutho udi demoqratoyutho la came kulle. Inaqla dmihalıq dawsat bi xasrathe, ahna ste gıdhowelan funoyo. Uloste lıkmaqıblina bı mede dmıçbırina acle. Ukul noşo klozım d’odıc u medano”.