Kito ğalabe ithbate dıkmahwın Tuma Çelik lo sımle hawbo

Bhaq di dacwa du qoyumo Suryoyo Tuma Çelik u sniğrayde Şehmus Aslan mawdacle, kito ğalabe ithbate dıkmahwın Çelik lo sımle hawbo.

 Bcayni zabno u sniğro Aslan mawdacleste u siqumo du bethdino qadmoyo d’Tuma Çelik.

Bi maqırhonutho dmıdlan me Şehmus Aslan dkıtyo u sniğro du qoyumo Suryoyo Tuma Çelik mırle; Bıthır mıd mido i ifade d’Tuma Çelik u mqimdino cal dlatwole mede bidothe mşadarle dmimıd mathle mene du admo di  DNA. Bıthır mıd midi a mathle kule nafıq u taşroro. Bu taşroro du Adli Tıp nafıq li holo layto mede dıkmahwe d’Tuma Çelik dsımle hawbo u mede dkımmo i athtathe dlıknofıq şroro.

Sniğro Şehmus Aslan mawdacleste, i athtathe şafıc zabno dşato bi holo yatiwo cama qoyume du gabo d’HDP, hawila mamle u hjome b’şıkılat mşahılfe, elo lo naqla mdacela dhawi hjomo ğensoyo acla. İ athtathe dsaymo idica bıthır mıd hawi u hjomo acla, Çelik mawbılole lu baytayda dkıtyo bı mditho hreto. Calathe u sniğro kımşayıl, athto dmisım hawxa hjomo acla, aydarbo kiba drawxo bi radayto du farsufo dıktıhmole, u dıza me mditho lı mditho hreto. Klozım dmahzımowa mene u dlıbcowa dhızyole.

U kımakıd da medonani kule dıkmahwe thomene dıkmitahti bıqdole d’Qoyumo Tuma Çelik. U kito sohude dıkımakdi di athathe dkımdaglo. Calu  tboco froso d’Turkiya dkıtyo masro bi şultonutho, u sniğro Aslan komır, kımqadmi xıd dkıtne hıne a mqimdine, a sniğre wa dayone. Bi dacwathe cal dlayto ithbate dıkmahwın d’Çelik dkıtyo hayobo, me zabno l’zabno kmawfıqila lu yawmoyo u b’leşono cjiqo ktıhmi u qoyumo Suryoyo Tuma Çelik. U bethdino d’Çelik gıdhowe 24 bu yarho d’Şbot bi mditho d’Ankara.