Lebnon u Ciraq u Turkiya b’qaşyutho krıhlın u furqoco marıhbono qtolnafşoyo dhawi bi cito d’Mor Alyas

U rişqutno d’Lebnon rabhaylawotho Josef Caun b’qaşyutho krıhle u hçomo marıhbono dsim athmıl casriye cali cito d’Mor Alyas da Rum Ortodoksoye bi şawtho di Dwelca bı Darımsuq. Caun bi maqırhonutho dhule sımle qroyto li şultonutho d’Suriya dmaydo a’tedbire dıklızmi laşan dlımisım tekrar u hçomano, udmisım u sutoro da citotho uda dukotho di cabade, da mhaymne, uda barmothoye d’Suriya kulle mayna mathhab dhowın, cal di hdoyutho du camo d’Suriya kımmathlo u asas du mnoco di fıtne b’gawıd du athro. 

Caun mqadamle ste buyoye lebonoye la yaqrotho da debhe du furqoco marıhbono, u tlıble hulmono msarhıbo la mçarhe. 

M’gabo hreno, i wazirutho di baroyutho du Ciraq b’qaşyutho krıhla u hçomo marıhbono dsim cali cito d’Mor Alyas bı Darımsuq. İ wazirutho Ciraqoyto bu buyono dıfrısla mırla “hawxa gunhe kımmathli nesyuno du qento dkıtle u nişo d’zorıc fıtne u frişutho bayn da came d’Suriya”. İ wazirutho di baroyutho du Ciraq mzaharla ste mu qento du hçomo cala dukotho di cabade, cal du medano nesyuno cjiqoyo dıkmisım bnişo dmımhe darbo lu kenşo mgawno d’Suriya, udıtofık u athro lafu cnufyo bayn da mathhabe. 

Mxasra hreto, u rişqutno dı Turkiya Rejeb Tayeb Erdoğan krıhle u hçomo marıhbono cjiqo dsim cali cito d’Mor Alyas bı Darımsuq, u mqadamle buyoye la yaqrotho da debhe, ulu camo d’Suriya uli şultonuthayda. Erdoğan bi maqırhonutho dıfrısle makadle du athrayde ksonıd u camo d’Suriya wi şultonuthayda mqabıl du hçomano u marıhbono dıkmisım mqabıl di mşaynutho udu şlomo gawoyo d’Suriya.