Leyla Guven marfiyo mu hbuşyo

Leyla Guven dhawyo u rımzo du mrodo ba maqırhonwotheyda u ba kafne dsımla marfiyo mu beth hbuşyo metul dkıtwola yawme bı dayno sidaye. 

Me gabo hreno bu parlemento d’Turkiya mıhlıf a qoyume dı dırşi cam hdode, ba idothe kmafıhmi hdode, awste naqat ba bokse u bu sloqo dcala tebloyotho.

İ qoyumto wi rişonitho zawgoyto d’DTK Leyla Guven marfiyo naqa hreto bıthır mıd msiko 3 yawme bu hbuşyo.

İ qoyumto marfiyo mu hbuşyo mi celtho dkıtla yawme zoyude dı damixo meqım ba hbuşye magle da yawme du bethdino dhuwole hiya mafitila ba hbuşye me meqım, dakbar u medano casqoyo dmıfhım elo b’Turkiya kowe u farsufe kibe domıx yawme zoyude dılo hşowo ba hbuşye.

Bıthır mu nfoqeyda sımla mamlo lu tboco froso u mırla. U cameydan tırlımahruw u moraleyde, latna ahna dkıtna maciqe, ahna xıd camo ema dhowe gıdrıbhina. Elo a masoke dıkmıskilan bciqutho rabthone mawxa hıne gıdxusri u ahna gıdrıbhina.

Guven bu mamleyda mırla latna ahna a qamoye u lo aharoyo dıkmımsoki dılo mqabıl dmede elo ahna u mrodeydan dkıtyo kino gımdawminale. Fayış Musa Farisioğulları bu hbuşyo mu msoko haroyo da qoyume dımsikiwo.

Me gabo hreno naqqa hreto a qoyumo du gabo di MHP u du gabo di CHP drışlın mqabıl dıhdode ba şaqmat u ba dokume bu parlemento du athro, bu zabno du droşo dkıtwe calu qonuno hatho da nature dıkmibıc dmitahwelın hirutho dmıstacmıli qaşyutho mqabıl da bnaynoşo.

A qalat wu mahyo da qoyume dlıhdode kyonoyo bu athro d’Turkiya metul dı layto darbo lu droşo awste kulha kobıc dsoyım u mede dhiye khozele triso.