Mabde kampanya b’Suleymaniye mqabil da hçome dıksaymolın Turkiya

SULEYMANIYE, Ciraq – Bu makıthbo du inistitut da guboye di mditho di Sulaymaniye bu qlimo d’Kurdistan, mabdiyo athmıl kampanya laşan dmitaklın a’hçome lo ruşmoye dıksaymolın Turkiya calu garbiyo du Ciraq. İ kampanyathe simo bu insiyativ di knuşto mdinoyto Ciraqoyto ubi sdirutho du huyodo da tukose du kenşo mdinoye uda tukose gawoye u nuxroye di Sulamaniye.

Bu buyono mşawtfo dıqre, griş u zuhoro calu gayso kaboşo dı Turkiya dmabdewole 17 bu yarhano d’Nison cuqobe folhoye ba fenyotho d’Avaşin, Zab u Metina bu qlimo d’Amidiya du İran. Elo ucdo a’Helikoptre kfayri ba thume oyarote da fenyotho dı Derluk, d’Şiladze uksaymi hçome cala turone du garbiyo du Ciraq. Meqım mathe ste, u buyono mawdacle dı Turkiya sımwola zıd m’50 hçome cala fenyotho d’Şiladze, dı Derluk ud’Kane Mase b’Nuhadra, u manhatwola ma tayisyotho grube d’folhe dmarkıwi ba fenyotho dkıtne qariwe ma turone d’Qandil.

Camgabıdathe, u buyono da tukose di Sulaymaniye mawdacle dıqtılwo udımçarahwo ğalabe farsufe ma comure da fenyothyani dıhzewolın ste husrone rabe ba mulkonaththe, bi netiçe da hçome dsımwola Turkiya ba n’ışne dşaficina. Mawxa ste ğalabe yaqrotho baynothaye yaqrotho Mşihoye mu camaydan çbiriwo dıtorın a’qıryawothaththe udımgalwın l’duktho dkıtne mşayne, elo hın yaqrotho ste fayişi ba qıryawothaththe laşan d’zurci an’arcothaththe cıl ma hçome dkımdawmi aclaye hul ucdo.

U buyono sımle qroyto dmisım u sutoro da mdinoye ma hçome folhoye dı Turkiya, udmiqadım elaye tezminat mqabıl da husrone dıhzelın. Bebzabno u buyono sımle qroyto l’Turkiya dmakılyo a’hçomayda, ud’mabdiyo a’bazare du şlomo, u mawdacle ste dıknıflo calu kenşo emwothoyo i wolitho dsoyım u duyoqo dcali aykanoyutho da thume du garbiyo du Ciraq. Camgabıdathe, u buyono tlıble m’Boğdod um’Arbil dmaydi tedbire m’athrone, bnişo dmisım u sutoro da mdinoye ma hçomani dı Turkiya.