Mabde kampanya bu nawlo lu huroro da neşe u claymotho da Druz b’Sweda

SWEDA, Suriya — Bu taro da gunhe uda dyoşe dqaşın bhaq da mdinoye di mditho d’Sweda, i sbutho da neşe htife da Druz nafiqo liholo xıd dkıtyo hdo ma gunhe barbroye rabe dkulle dıkmisomi mqabıl di noşutho, udıtrelın bıthraye şalqa d’ruğzo camonoyo u emwothoyo. Bu tarano, hfite mi mditho d’Sweda mabdelın kampania bu darbo du nawlo bu calway “maxlesu a’neşe d’Sweda”, bnişo dmişalıt bahro cali sbuthathe, udmıtlıb dmimıd hşowo ma hayobe. 

Lfuth taşrore emwothoye, kito ucdo 80 neşe u claymotho da Druz dlayto mawdconutho cali ctiduthaththe, mbayn d’105 neşe u claymotho dımthabıt u htofaththe mu zabno dımşarelın a’gedşe du cnufyo b’Sweda bu yarho dı Tamız dşaficina. Ubebzabno, a’yaqrotho da neşe da Druz dmarfın maglelın liholo cal aykanoyutho mahişonitho rabtho dıkcayşila a’htifoye, cal d’ğalabe menaye lıkmajrın dıdıcri la botaththe mi celtho da tehdide dkito la hayaththe. 

A’hfite d’Sweda mzaharlın ma gunhani du htofo dmişahılfi l’warqo dıkmitıstacımlo b’şıkıl siyasi, bu zabno dkito sohude di cayno dmawdaclın da grube dkıtne masre cami şultonutho d’Suriya kmıstacımli i ctidutho da neşe da Druz xıd qoz mqabıl du terfiyo da folhe di şultonutho dmidi xıd yasire ma haylawotho da Druz. 

Lfuth yadıcthone bu haqlo du huquq, i sbuthathe kımmathlo dyoşo qriho lu qonuno emwothoyo noşoyo ula qyome d’Çenev dıkmınci dmıhçım cala mdinoye aw dmımsoki, u mawdaclın ste da gunhani kşowın l’gunhe du qrobo dıklozım dmimıd hşowo mqabıl dıththe. 

A’hfite d’Sweda bi kampnayaththe, makadlın ste da neşe latne warqo la bazare, elo sbutho d’neshono noşoyoyo, u tlıblın dmisım baroyo mudaxala emwothoyto laşan dmitarfın, udmimıd hşowo ma hayobe.