Macron mawdacle u Iraq kfoyıt lu maşıqlo di demoqratoyutho

Bıthır mu dcorayde lı Fransa, u rişqutno Emanuel Macron mawdacle, du athro du Iraq kşofıc ucdo mu maşıqlo du nqolo lafi demoqratoyutho.

 Bebzabno, Macron makadle dı Fransa ksındo kulonoyith i morutho du Iraq mqabıl da hjome u di mudaxala dıkmisomo ba sebwotho gawoye du athro.

 U rişqutno d’Fransa Emanuel Macron bu buyono dıfrısle bıthır mu dcorayde li erişkoyto d’Paris, mırle; U athro du Iraq kşofıc ucdo b’zabno dkibe casqowotho. Ucıl mi zoxutho dhawyo mqabıl di xilafa d’Dacış, kito hul ocdo menyono d’marhıbone dkımathli mabuco dkımhadıd u Iraq, ifnitho u ahnaste.

Bebzabno, Macron dmathkarle du qrobo hawi celtho dımgalwın u camo ma dukothayde, mawdacleste dkito b’qamuthıd du Iraq maşıqlo casqo du terkiwo di morutho, u du froso di şalyutho dgıdgurşo zabno yarixo ba fenyotho dsim u hurorathe me Dacış.

Camgabıdathe, Macron mawdacle da casquwotho dkito b’qamuthıd du Iraq lo balhude masrene cami mşaynutho, elo u athrano kşofıc ucdo bu maşıqlo du şuhlofo demoqratoyo, u mawxa kito ğalabe tarmiyotho dıklozım dmişawşıti bu haqlo du yulfonoyo, momunoyo u kenşoyo. Calathe Macron mawdacle da celothani makfiyonene dqathle u Iraq wi moruthayde snodo kamilo mu athro dı Fransa.