Maenza mahwela hfuxyo mqabıl du qedomo d’Al Asad

İ mcadronitho du rişono du Komisyon Amerikoyo di Hirutho Emwothoyto da Tawdiyotho Nadine Maenza, frısla egartho bi dafayda du Twitter calu qedomo du rejim d’Suriya mqabıl da Mşihoye du athro.

 Maenza kalyo cala hawbe dsimi cala qalilotho tawdithoye u du rişathro Başar al Asad lıksonıd u terkiwo di hirutho tawdithoyto b’Suriya.

 İmcadronitho du rişono du Komisyon Amerikoyo di Hirutho Emwothoyto da Tawdiyotho Nadine Maenza, dmıştawtafla kımo naqlat li tahrazto d’Şabtho Kamılto b’Suroyotv, frısla egartho bi dafayde du Twitter cali aykanoyutho da qalilotho tawdithoye dilonoyith da Mşihoye bu garbyo u bu madınho d’Suriya.

Bi egarthathe dıfrısla bu Twitter Maenza mırla; Hani zıttır me 50 eşne, u rejim du Bacth d’Suriya, mankarle u şerşo da Suryoye-Othuroye-Kaldoye u dan Armınoye, bnişo dsoyım Suriya Caraboyto. U rişathro Başar Al Asad, latyo sanodo du zedqo di hirutho tawdithoyto u kull naqla kımahwe ruhe, dkıtyo u mhafdono rişoyo da Mşihoye du athro.

Maenza flığla u mbarbazla u buyono dıfrısle athmıl u gabo du Huyodo Suryoyo dıkrıhle i maqırhonutho dfawdo d’Al Asad cali ithutho u calu şerşo du camaydan u dımdacewole, da Suryoyeste Caraboyene. Maenza dsımwola meqım socurutho li Gozarto u mwasafwola a fulhone dsimiwo u mırwola; İ mdabronutho yothoyto kmathlo a came di fnitho kulle Suryoye-Othuroye, Kurdoye u Caraboye u kfılho leşan dımşarır u nişo dkıtlın a camani dıkhoyın camhıdode.

Maenza grışwolaste u zuhoro cali ithutho da hayle kaboşe d’Turkiya u da marhıbonayda bı dukotho frişe du garbyo d’Suriya, ahjome dıksaymi calu qlimo, laqyowa a hayle folhoye du camaydan u mawdacwolaste; da Suryoye xıd camo hamicene ucdo dhınne dımdabri ruhaye, u klozım dmisım fulhone bu maşıqlano leşan a Suryoye dqudri dmaydi a zedqathe bu taro du lumodo dsımwo b’Bruksel ba 2017.