Mahto i şetısto qadmoyto du benyono hatho di madraşto d’Edessaskolan bu Swed

NORSBORG, Swed — Athmıl falgıdyawmo, mhalıq u rawşo qamoyo awkith mahto i şetısto qadmoyto du benyono hatho di madraşto d’Edessa d’Urhoy bi mditho d’Norsborg bu athro du Swed. 

Lu zawhano mıştawtafle i qadişutho du fatıryarxo di cito Suryoyto Ortodoksoyto Mor İğnatiyos Afrem Trayono. Mor Afrem bi slutho dmaqımle mbaraxle i duktho dgıdmıbnoyo eba i madraşto d’Edessa, ubu mamlo dsımle, mqalasle a’fulhone kulle dıkmisomi laşan du bnoyo du şutosano u yulfonoyo. 

Lu zawho du heloqo du rawşo qamoyo mıştawtafle Metin Rhawi xıd mathlono du Huyodo Suroyo d’Urifi ESU, Jony Masso u rişono du Huyodo Orumoyo Tibeloyo, u mathlone d’şutose mşahılfe, u menyono d’hfite folitiqoye mi karxutho di fnitho d’Botkyrka du Swed baynothaye Gabriel Malke, Stefan Dayne u Aday Beth Kınne. 

Lu zawhano ste mıştawtafle u efetrufo fatıryarxoyo du Swed hasyo Mor Diyosqoros Bınyamen Ataş wu notarrozo fatıryarxoyo hasyo Mor Awgin Alxuri Nicmat u menyono d’kohne u dayroye. 

U benyono hatho di madraşto d’Edessa gıdhobış b’gawe menyono celoyo d’sedre, salone da turgome, u qeloyotho da nesyune yulfonoye.