Mahwe hfuxye calu fusqono dmid bu bethdine calu qatlo d’Rafiq Alhariri

Bıthır mu fusqono dmıdle u bethdino emwothoyo dı Denhax bi sbutho du qatlo d’Rafiq Alhariri, u rişwazire dmeqım d’Lebnon Sacd Alhariri mawdacle dhathe i naqla qadmoytoyo bu makthabzabno da suikaste folitiqoye d’Lebnon kmitagle cali şrorutho.

 Camgabıdathe, Amerika dmawdacla du fusqono du bethdino d’Lahay kımakıd du gabo d’Hizballa marıhbonoyo, İsroyelste mawdacla du dactid du camo Lebnonoyo yasiro d’Hizballayo.

 Athmıl u bethdino dilonoyo dcal Lebnon dıkmısnıd m’Emwotho Mhaydotho, bu fusqono haroyo dmıdle thımle ruşmoyith u hadomo du gabo d’Hizballa Salim Cayyaş bu suikast du qatlo du rişwazire catiqo d’Lebnon Rafiq Alhariri i şato da 2005.

U rişwazire dmeqım d’Lebnon Sacd Alhariri dkıtyo u abro d’Rafiq Alhariri, athmıl huweste mıştawtafwole lu bethdino dilonoyo d’Lahay, u bıthır mu fusqono dmid, Alhariri bu mamlo dsımle lu tboco froso hule şudoyo dlıgıdmanhıt katfo hul dlımimıd hşowo ma qatole du babo, u mırle “hathe i naqla qadmoytoyo bu makthabzabno da suikaste folitiqoye sagiye dhawın b’Lebnon dıkmitawdıco eba i şrorutho la Lebnonoye. U mede ulsoyo du fusqonano u makthabzabnoyo egarthoyo dıkmawdıco du zabno dlıkmimadwo ebe hşowo mu gunho folitiqoyo ucdo tayım”.

Calu şuwolo dmın hzayto kıtle cali maqırhonutho d’Hasan Nasralla dmırwole meqım mu bethdino du gabayde latle esore camu fusqono d’Lahay, Alhariri hawxa mfanele “a’Lebnonoye kulle masrene camu fusqonano. Kımmina lkulle tro ulo ha dmıtyaqın menayna dgımqadmina debho bi sbuthathe. Ahna u debho hulan u timo dkulle dkıtlanyo, wu mede dıkmıtlıb adyawma du gabo d’Hizballayo dobe u debho”.

Megabo hreno, u waziro di baroyutho d’Amerika Mayk Pompeo bu hfuxyo dmahwele mawdacle di şultonuthayde kmaydo u fusqono du bethdino d’Alhariri, u mathkarle du thomo d’Salim Cayyaş dkıtyo hadomo bu gabo d’Hizballa kımakıd du gabano tukoso marhbonoyo.

Pompeo mırleste “ahadome du gabo d’Hizballa lıkfılhi lu yuthronathe u dilonoyo, wu thomo d’Cayyaş bu qatlo d’Alhariri kımakıd du mede dımşarela britho dmıctarfo ebe du gabo d’Hizballa lıkımdafıc Lebnon, elo kımmathıl tukoso marıhbono du nişayde dmarwıh i agenda tawdithoyto cjıqto du İran”.

Méxasra hreto, iwazirutho di baroyutho d’İsroyel bu hfuxyo dmahwela calu bethdino d’Alhariri mırla “u gabo d’Hizballa msıkle u dactid da Lebnonoye xıd yasiro side, bnişo dımşabıl yuthrone baroye. Klozım anathrawotho dıbritho dmaydi tedbire mqabıl du grubano u marıhbono laşan dımcadri Lebnon dımharır ruhe mu qentano”.