Mahwe hfuxye mqabıl da qatle dıkmisım cala htife bu Iraq

Emwotho Mhaydotho u athrawotho mşahılfe beynothaye Amerika u Fransa bı qaşyutho krıhlın a suikaste dsimi cala farsufe hfite bi mditho d’Basra bu taymno du Iraq.

 U Huyodo d’Urifi, u tukoso d’UNAMİ wi rişızgadutho d’Amerika u dı Fransa b’Boğdod, ba buyone dıfrıslın mahwelın ilo thınihuthathe cali marhıbonutho dıkmisomo cala mdinoye hfite u makadlın, dıklozım dmimıd hşowo ma hayobe.

 İ mathlonutho d’Emwotho Mhaydotho bu Iraq UNAMİ bu buyono dıfrısla, bı qaşyutho krıhla u qatlo d’2 mdinoye hfite wa hjome dsimi cal 2 hrene bi şabtho dşaficina bi mditho d’Basra bu taymno du Iraq. UNAMİ tlıbleste mi şultonutho du Iraq dmazido a fulhonayda, bnişo dmimıd hşowo ma hayobe u dılo mikarıri a hjome marhıbone dıkmisomi cala hfite.

Camgabıdathe, i rişizgadutho d’Amerika b’Boğdod bu buyono dıfrısla b’qaşyutho krıhla ahjome haroye dsimi cala hfite du kenşo mdinoye wa saqıbloye d’Basra, beynothaye menyono ma suikaste. İ rişizgadutho Amerikoyto bu buyonayda mırla  A hjomani dsimi kmıhşowi dyoşo qriho da zedqe noşoye, ukımaydina dmaydo i şultonutho du Iraq uhşowo dıklozım ma hayobe lfuth u qonuno”.

Bebzabno, i rişizgadutho Amerikoyto naqla hreto makadla iqroytayda dmitahwe mkono la hfite dcayşi u dfılhi bı mşaynutho u bı şlomo, dlo zuctho u hjome du myodo du hayf mqabıl da hfitwothathe. Camaniste u Huyodo d’Urif maslele a suikaste dıkmisomi cala farsufe hfite bu Iraq.

U rişizgado du Huyodo d’Urifi bu Iraq Martin Huth mawdacle u ğamo rabo dıktucni calu qatlo da farsufani bi mditho d’Basra me ğrobe msalhe. Me gabo hreno, i rişizgadutho d’Fransa b’Boğdod b’qaşyutho krıhla a suikaste da mdinoye uda hayle hfite bu Iraq. Bu buyono dıfrısla mırla; klozım a hayobe dmiqadmi li kinutho. Ahna latna thınihoye mu hboso u mi marhıbonutho dıkmisomo cala gelyunore u da mathlone du kenşo mdinoye.