Mahwe hfuxyo cala yuqdone dhawın ba arcotho di zaricutho b’Karamles

Ayuqdone axilın arcotho rabe di zaricutho bi qastra d’Karamles bi daşto d’Ninwe.

 Cala yuqdonani dıtrelın husrono momunoyo rabo, mahwe hfuxyo mhın rişone citonoye u mşale Iraqoye.

Ba yawmani dımşarele u zabno du hsodo da hete bi daşto d’Ninwe bu garbiyo du Iraq, hawi yuqdone d’arcotho rabe di zaricutho bi qastra d’Karamles dıtrelın husrono momunoyo rabo.

Cala yuqdonani dhawın, u kohno di cito Kaldoyto d’Karamles qaşişo Thabıt Habib mawdacle di nuro mşarela mi qritho d’Manarıt Şabak, u tafyo bıthır li qastra d’Karamles dkıtyo masırto cami mditho Suryoyto d’Bağdede hul dmatyo li qritho d’Badana wi fnitho d’Alxazır.

Qaşişo Thabıt bi maqırhonutho dıfrısle bi dafayde du Facebook, mawdacle di nuro dımşarela mi qritho d’Manrıt Şabab mawqadla i mazracto di cito d’Karamles wa şutosayda u hawyo celtho d’husrono rabo.

Laşan dmıkle cali şrolutho di celtho da yuqdonani, qaşişo Thabıt mawdacle d’azzeyo grub d’clayme li qritho d’Manarıt Şabak u cabiri lu bayto dnafiqo mene i nuro. Ubu mamlo dhawi cami mırto du bayto mıctarafla da nacimayda hınene dmaqıthlın i nuro bu şuroyo u bıthır mıdrawiho lıqadiri dmaydila lu duyoqo, elo mbarbızo la qıryawotho u fenyotho hrene di daşto d’Ninwe.

Callathe, qaşişo Thabıt Habib dımakadle dıklozım dmimıd hşowo mu hayobo, mawdacleste dhuwe lıktohım a’Şabakoye dsımlın a’yuqdonani bidactho, elo balhude kmathkır di nuro mşarela mıhdo ma qıryawothathe dışma Manırt Şabak. U mawxa a’maqırhınwotho dıktıhmile dıksoyım fıtne bayn da came di daşto latne şarire u batilene. Bebzabno, qaşişo Thabıt mşayele, qay a’haylawotho du sutoro mdinoyo wa comure di qritho d’Manrıt Şabak lıfayiti li harake ud’matfın i nuro?.

Camgabıdathe, ba hfuxye dmahwın cala yuqdonani, u hiğmuno d’Ninwe Najım Aljabburi hule amro dmıftıh buqore msarhıbe cala yuqdone dhawın bi daşto d’Ninwe, udmitagle cala hayobe b’zabno d’şawco yawme, udmiqadmi lu bethdino.