Maltım zuze laşan u bnoyo di mditho d’Abrohom u nbiyo camgıd di mditho makthabzabnoyto d’Ur

İ şultonutho du Iraq maltamla hul ucdo 19 milyare dinore, laşan u bnoyo di mditho d’Abrohom u nbiyo camgıd di mditho makthabzabnoyto d’Ur.

İ dawsathe funoyoyo lu talab dhawiwole i qadişutho du papa Mor Fransis Qadmoyo bi socurutho dsımwole lu Iraq bu yarho d’Oder dşaficina.

Cami socurutho dsımwole i qadişutho du papa Mor Fransis lu Iraq meqım hedor ışto yarhe, britho kula fayış kımşalto bahro cali mditho makthabnoyto da n’abohothaydan d’Ur dıknıflo adyawma bi hiğmonutho d’Dhi Qar bu taymno du Iraq, u hathe ste cali ulsoyutho makthabzabnoyto u ruhonoyto dkıtla i mditho. Mawxa ste i şultonutho du Iraq kımnasyo ucdo dmqimo i mditho d’Ur cali rağlo udımşaşwıto u benyonayda u tahtoyo b’şıkıl dıkşowe lu cımqo dkıtla bu makthabzabno du Iraq. Bu tarano, Boğdod kıbco dbınyo i mditho d’Abrohom u nbiyo camgabıd di mditho d’Ur xıd funoyo lu talab dhawiwole u papa du Vatikan.

U mdabrono di dayira da n’athare di hiğmonutho d’Dhi Qar Camer Cabdılrazzaq bi maqırhonutho dhule lu froshezwo d’Skay News Alcarabiya mırle “i qadişutho du papa bi socurutho dsımwole li mditho d’Ur, maqımwole slutho bi mdithathe dmawladwo eba Abrohom u nbiyo. U papa makadwole ste inaqlayo di mditho d’Ur i nuqazto rabtho dkulle du turist da Mşihoye dıbrithoyo”.

Laşan u bnoyo di mditho d’Abrohom u nbiyo, u mşalo Iraqoyo Cabdılrazzaq mawdacle dmaltım hul ucdo 19 milyare dinore laşan dmitafito i tarmithathe la haye. Ubi mdithathe gıdmıbne utole u qentrune la turist, qentrune du nyoho udi feshutho, dukane di tagorutho, şuqone doronoye u marduthoye. U kitoste farsufo mu camaydan dımqadamle zuze laşan dmıbne cito u masığdo cam qentrun du diyalog bayn da tawdiyotho bi mditho d’Abrohom u nbiyo.

Cabdılrazzaq mawdacle ste dkıbci a’şırkat rabe du Xaliç Caraboyo dkıtlın nesyuno rabo bu haqlo du turist, dımcadri bu bnoyo di mditho d’Abrohom u nbiyo ba tarmiyotho dgıdmisomi eba, u mathakarle ste dkıtlın u nişo dgurşi kul şato ba malyune d’farsufe turist ma n’athrawotho mşahılfe dıbritho, cal di mdithathe dgımisomi b’maşıqle mşahılfe, kıtla sukole ruhonoye u marduthoye tibeloye.