Marine Le pen gımraşho ruha la guboye di rişonutho d’Fransa

U rişonitho du gabo tuhmonoyo d’Fransa-u Gbino Athronoyo Marine Le Pen m’akadla dgımraşho ruha la guboye di rişonutho dıkmıntır dmisomi 22 bu yarho d’Nison da 2022.

 U rişqutno Emmanuel Macron, heş lo mawdacle en gıdmraşıh ruhe aw lo. Elo u mede dıkgorış u zuhoro, lfuth u istatıstik dsim d’Le Pen dkıtla 48 ba mo du snodo du camo, mqarawla la 52 ba mo du snodo dkıtle u rişqutno Macron.

 Lfuth u şutoso Amerikoyo da buhone The Harris Interactive, u snodo dkıtla ucdo i rişonitho du Gbino Athronoyo d’Fransa Marine Le Pen mati  l’48 ba mo ubu mınyonano dkıtla Le Pen, kımqarwo ğalab lu mınyono dkıtle u rişqutno Emmanuel Macron-dıkmısnıd 52 ba mo da qole du camo Franşoyo.

Hathe kuthyo li mıcne, dothe u snodano dımdawım li rişonitho du gabo yaminoyo qaşyo Le Pen, kıtla gado rabo dminaqyo rişathqutno bu maşıqlo qamoyo da guboye di rişonutho dgımisomi 22 bu yarho d’Nison di şato dıbqamuthayna. Ba guboye da 2017’ste, athyowa Le Pen bu darğo trayono uba 2012 athyowa bu darğo tlithoyo.

Bu zabno di rişonutho d’Macron, nafıq ğalabe şwole-xıd mathlo u qetro da falohe wa tagliyotho dsimiwo mqabıl dide, u kriz du virus di Corona wu qedomo dhawile lu qatlo du malfono bu yarho d’Teşrin u qamoyo da 2020 uğer. A şwolani’ste kımahwe lıgsofın ba 15 yarhe dfayışle bi rişonutho du athro. Le Pen kmısnodi bi siyase dkıtla mqabıl du Huyodo d’Urifi ubu qedomayda la Maşılmone uli sbutho du tedciro da galwoye.

Calathe Marine Le Pen, mqadamwola yawme d’Cruto rmoyto lu parlamento, leşan dmitawfıq qonuno dıkmonıc a neşe Maşılmone dımkasın rişaye-awkith u hijab ba dukotho ruşmoye. Le Pen mırla; Lfuth i hzaytaydi, i mandelo-i şarpa, remzo da lbuşe da Maşılmone’yo-da ideolojiye di Maşılmonutho uda qatole’yo. Ahna latlan sniqutho la ideolojiani b’Fransa.