A gabe folitiqoye d’Qabre Hewore krıhlın u qedomo dı Turkiya dıkmıstacmılo a maye

A’gabe folitiqoye di mdabronutho yothoyto dkıtne hfite bi qastra d’Qabre Hewore bu garbay madınho d’Suriya, krıhlın u qedomo dı Turkiya dkımdawmo dmıstacımlo a’maye du nahro dı Froth xıd zayno mqabıl da came di fnitho.

 A’gabe folitiqoye d’Qabre Hewore bu buyono mşawtfo dıfrıslın lu tboco froso, grışlın u zuhoro du kenşo emwothoyo cala n’athrawotho dı Turkiya, Rusya, u İran u Darımsuq dkımnasın dmohın i şalyutho dkito ba fenyotho du garbiyo udu madınho d’Suriya.

A’gabe folitiqoye, baynothaye u gabo du Huyodo Suryoyo d’GHS dıkfılhi laltah du gefo du Mawtbo d’Suriya Demoqratoyto d’MSD di qastra d’Qabre Hewore, bu buyono dıfrıslın lu ray gawonoyo dıbritho, krıhlın u dewam du qtoco da maye du nahro dı Froth mi xasra dı Turkiya dıkmıstacımlo i sbuthathe xıd falqo mu qrobo dilonoyo dıksaymole cala came du garbiyo udu madınho d’Suriya.

Bu buyono dıqre mu hadomo di sictho qentrunoyto du gabo du Huyodo Demoqratoyo d’Suriya di PYD Cabbas Hısen, kmıgrış u zuhoro b’ulsoyutho cali mdabronutho yothoyto dqadiro ba mkone dkıtla dımthabto dkıtla u haylo makfiyono dmadiro a’fenyothayda cıl ma krize dıkmicoşi bıbritho ucıl ma qrobe dkımdawmi ucdo bu madınho mescoyo.

A’gabe d’Qabre Hewore bu buyonaththe kımmi ste “i mdabronutho yothoyto kımhalxo lafqıddam cıl ma hçome dıksaymolın Turkiya wu kboşayda l’fenyotho mi çuğrafya du garbiyo udu madınho d’Suriya, ucıl mu qtoco da maye dı Froth udi nuqazto d’Calok dıxlıqle kriz noşoyo l’zıd m’tlotho malyune dıbnaymothoye d’Suriya”.

Camgabıdathe, u buyono dıkrıhle u hçomo barbroyo dıksaymole Turkiya calu garbiyo du Ciraq, tlıble ste mu kenşo emwothoyo dsoyım hboso cala n’athrawotho dkıtne bıthır du kriz d’Suriya awkith Rusya, Turkiya wu İran, udmihalıq dawse laf şroyo folitiqoyo bi mıştawtfonutho da bnaymothoye d’Suriya kulle.