Maslimo i radoyto di gala di Suroyo TV lu morayda
Maslımo i duşno di radoyto di Gala du yawmo şatonoyo da 21 eşne d’Suroyo TV, lu morayda dkıtyo myaqro Musa Çankurt dbe Dahıke. Meqım mathe maslımowa’ste i duşno di şoctho du Sayfo li sictho di cito d’Mor Yahkub b’Södertelje du Swed, u bıthır’ste i cisaqtho di berule l’Teodora Çelik b’Delmenhorst d’Almanya.
MIDYAD, Tur Abdin — Hani kmo şabe a mtaybone di Gala da 21 eşne di mşatsonutho d’Suroyotv dsimowa 28 bu yarho d’Hziron bu salon di cito d’Mor Afrem b’Viyana d’Austoria, mabdelın fulhono leşan dmaslımi la morathe a duşne dgrişiwo mu lotteri di Gala. Ahnaste ba tebeydan, mnaselan dmawdcinalxu da duşnani dmatın la morathe.
20 u 22 bu yarhano maslımiwo a duşne di şoctho du Sayfo li sictho di cito d’Mor Yahkub b’Södertelje du Swed uli wi cisaqtho di berule li claymtho Teodora Çelik b’Delmenhorts d’Almanya. Ucdo’ste lfuth i mawdconutho dmatilan, maslım u duşno tlithoyo’ste.
U duşno di radoyto d’Volkswagen di numara du lotteriyayda-2886, matyowa l’myaqro Musa Çankurt dbe Dahıke dkıtyo ha ma dacore du camaydan me Swisra lu athro dan abohotho-li mdito d’Mıdyad. U şukonano maslım b’ruşmoyutho lu moro, mu rişono du Federasyon da Hudre Suryoye b’Turkiya Evgil Türker dımqadamle tahınyotho lebonoye l’cammo Musa.
Myaqro Musa Çankurt dbe Dahıke bebzabno, farsufo rahomo du camayde ula fulhone umthoye’yo uha ma mşatsone u hadome du froshezwo d’Suroyotv’yo. Cal ışme di mdabronutho du froshezwo kımmina brixo Musa Çankurt dbe Dahıke. Bu dumyano fayış ucdo belhude u duşno da 2 fetqe dlu athro, di numarayde-3403.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
