Mjarıh 72 farsufe ba tagliyotho d’Lebnon

A taxtuşe dhawın athmıl casriye beyn da mtagliyone uda hayle di mşaynuthoba bu garbyo d’Lebnon, mdawamlın hola şoce du lalyo u bıthır kalın.

 Ba tagliyothani dsimi mqabıl du kriz momunoyo d’Lebnon, mawdıc dımjarıh 72 farsufe; beynothaye 16 ma hayle di mşaynutho.

 U kriz folitiqoyo u momunoyo d’Lebnon, kımdawım hani yarhe u calathe mabdewole u camo tagliyotho mqabıl di şultonutho d’Beyrut, cal dlo qadiro dımcadlo u dımsafyo aşwolani dkımdawmi bu athro.

Walaw heş kımdawım u qento di Corona bı britho, a taxtuşe beyn da mtagliyone uda hayle di mşaynutho d’Lebnonste lo kalın uba yawme haroyaniste, bıthır mıd nahıt u timo da zuze du athro, qaşın a tagliyotho wa hfuxye du camo.

 Athmıl naqla hreto, kfixi a mtagliyone la zabuqone bı dukotho frişe d’Trablous bu garbyo d’Lebnon ubi netiçe nafıq taxtuşe beyn da mtagliyone uda hayle di mşaynutho. A taxtuşani dımdawamlın hola şoce du lalyo, bıthır kalın, elo lfuth a şutose du hulmono, hol 72 farsufe mçarhi ba taxtuşani; beynothaye 16 ma hayle di mşaynutho.

 13 ma mçarhani’ste, baroyo nqili la bethkrihe di fnitho leşan dmicalçi. I claymutho mhalaqla Molotov cocktail ba hayle di mşaynutho, dımfanelın bu mhoyo du ğaz da damce uba buğre du plastik. U gayso Lebnonoyo, nqile heş folhe l’Tabbaneh, bnişo dı qodır dmakle a tagliyothani.