Mnic dmisım duyoqo a bethqbure dımqafanwo b’Kerboran

U hudro da zedqe noşoye u ferco d’Merde mıdle isbutho da garme dımqafın b’Kerboran li ido elo işıltonutho mahıtla fusqono di ğnizutho bi sbuthathe.

 U hudro dımşadarle farsufe dızın li mcartho dımqafın a garme eba, laşan saymi buhono mın garmene, elo lıqayıthlın metul du mqomdayono qlimoyo, mahıtle mnoco dmizıl li mcarthathe u misim buhono cala garme.

A garme dımqafınwo bıhdo mcartho qaruto l’Kerboran mu taraf dıha farsufo me tamo kulnoşe kımşayıl mın garmene, hal mu zabno du sayfone awste mu qatlo dhawi ba tmoniyat dıkmitawmarlın fayili mejhul a qatole latne idice aw mıne.

Bhaq di sbuthathe u qoyumo du cameydan Tuma Çelik mqadamwole rmoyto lu waziro di gawoyutho, u bıthır mathe u hudro da zedqe noşoye azeyo dhoze a garme laşan dsoyım buhono aclaye. Elo işıltonutho mahıtla ğnizutho awkith lıkowe dmıhzın aw dmisım tebe aclaye.

Lfuth imawdconutho dıfrısle u hudro da zedqe noşoye u ferco d’Merde mırle ktocnina ğamo rabo dlayban saymina buhono cala garmani dıkmisım taxmin dkıtne hul 40 farsufe.

A garmani dkıtyo mınyono rabo bgawe dımcartho kımthabti dıqtil zıttır me 30 farsufe camıhdode, u hathe krımzo calu zabno du Sayfo di şato da 1915 dhawi calu camo Suryoyo-Othuroyo.

U mede ulsoyo bi sbuthathe u hboso dımdawım cali şıltonutho laşan dmawdıci agarmani dayna qtolcamone dsimi.