Mor Luis Sako yatuw cam Mascud Barzani

U rişono di marcitho d’Mawsal ud’hedora di cito Suryoyto Orthodoksoyto hasyo Mor Niqodimos Dawud Matti Şaraf sımle socurutho li qadişutho du fatıryarxo di cito Kaldoyto d’Bobel Mor Luis Rofayel Qadmoyo Sako.

Mxasra hreto, fatıryarxo Sako yatu camu rişono du gabo Demoqratoyo d’Kurdistan Mascud Brazani, u drışle acme i aykanoyutho du camaydan bu qlimo.

Athmıl casriye, u hasyo di cito Suryoyto d’Mawsal ud’hedora Mor Niqodimos Dawud Şaraf, sımle socurutho lu qentrun fatıryarxoyo di cito Kaldoyto d’Bobel b’Caynkawa, u mıstaqbıl mi qadişutho du fatıryarxo Mor Luis Sako uma 2 hsayo mcadrone Mor Basilyos Yaldo, u Mor Robert Çırçis.

Bi ytawtathe, a tre gabe drışlın i aykanoyutho gawonoyto du Iraq u aydarbo kibe dhowe methcadronutho beyn da citotho, bnişo dmınfıq mqabıl da qetre dıkloqe u camaydan dıkhoye bu athro. Me gabo hreno, u rişono du gabo Demoqratoyo d’Kurdistan-KDP Mascud Barazani, mıstaqbele athmıl b’Arbil fatıryarxo Sako cami taşdartayde da mcadrone.

Bi ytawtathe, a 2  gabe mawdaclın a hzayothathe cali aykanoyutho folitiqoyto du Iraq, cala qetre dıkloqe maşıqlo folitiqoyo ucali ciyeşe mşawtafto beyn da came Iraqoye. Bi ytawtathe, a hadire makadlın dıklozım dmitayıb arcutho dkiba dımşaçco u camaydan wa came hrene d’ducri la bote ula fenyothathe, u dlımıftakri dtorın u athrathe.

İ ytawtathe beyn du fatıryarxo Sako u Brazani, athyo luhwoyo bıthır mi egartho dımşadrowa ma comure du camaydan d’Caynkawa li qadişutho du Papa Mor Fransis Qadmoyo, u dmaşkewolın li qadişuthayde i thılmiye wi dişutho dıkmisomo aclaye mi şultonutho du qlimo d’Kurdistan.