Mşakıl sictho laşan dmafito la haye a fuqdone du papa

İ şultonutho du Iraq mşatasla sictho da wazire, laşan dmafito la haye a fuqdone di qadişutho du papa du Vatikan Mor Fransis Qadmoyo bi sbutho da qetre dkıtle u camaydan bu Iraq.

Bayn da fuqdonani kito u groşo da grube mzayne d’Alhaşd Alşacbi mi daşto d’Ninwe wu tedciro da bote u mulkone kbişe du camaydan.

Cıl mıdlıkmırğoşo heş i netiçe di socurutho dsımwole u papa Mor Fransis lu Iraq bu şuroyo du yarhano, elo naqla hreto mabuce mi şultonutho d’Boğdod b’darğo celoyo, bi maqırhonutho dhulın li sferyawmo mşamahto d’Alcarabi Aljadid, mawdaclın dkito ucdo sictho da wazire dıkmafito a’fuqdone du papa la haye, bnişo dşıryo hın ma qetre dkıtlın a’Mşihoye d’Ninwe ud’Boğdod udmitahwelın a’zedqaththe.

Mbayn da qetre u sebwotho dıkmibıc ucdo dmiqafelın şroyo, kito u tetimo du haylo da grube mzayne dkıtne bnayqyome du İran ba fenyotho di daşto d’Ninwe dıkhoye ebaye sagiyutho mu camaydan u Kaldoyo Suryoyo Othuroyo, udmişakıl sictho da dayone laşan dhayro cali sbutho da mulkone gawonoye da Mşihoye baynothye dayre, citotho, hudre, bote, mulkone dilonoye u waqfat tawdithoye dıkbişiwo heş mi şato da 2003 bı Boğdod uba hiğmınwotho hrene du Iraq. Camgabıdathe, i sictho da wazire gıdurşo ste i sbutho dmitahwelın a’Mşihoye du Iraq duktho b’gawıd da şutose ruşmoye di şultonutho.

Mgabo hreno, mşalo Iraqoyo b’darğo celoyo hule maqırhonutho li sferyawmo d’Alcarabi Aljadid xıd funoyo lu şuwolo dcali netiçe dmamtela i socurutho du papa lu Iraq. U mşalo Iraqoyo dlımathkır ışme bu funoyayde mırle “i sictho di şultonutho gıdmafito la haye a’fuqdone du papa, u gıdurşo ste hın ma sebwotho dıgrışwole u papa u zuhoro aclaye ba ytawyotho dhawiwole camu rişqutno Barham Saleh, ucamu rişwazire Mustafa Alkadhimi. İ sictho da wazire gıdkılyo ucdo cali sbutho dmişawşıto i aykanoyutho ba mdinotho u qıryawotho di daşto d’Ninwe, dmıftıh u darbo bqamuthıd da nabne di daşto dmıştawtıfi lu haqlo di folhutho udmitasırhi pwelıs, dmitarhıqi a’grube mzayne ma qentrune da mdinotho u qıryawotho di daşto bşıkıl dlıkobe aftho la grube mzayne dhowelın esore baroye cama comure di duktho, dmisarıhbi a’fulhone du bnoyo u hethotho di daşto d’Ninwe, u dmıftıh u darbo bıfşitutho qum da tukose Urifoye dmahwewolın mabco bıthır mi socurutho du papa dımcadri a’fenyotho da Mşihoye di daşto”.