Mşakıl şultonutho hathto du athro d’Beljika

Bıthır 493 yawme dı şafıc cala guboye gawonoye d’Beljika, mşaklo bi harayto i şultonutho hathto du athro.

 Elo a Flaman du athroste latne thınihoye, u sımlın qroyto l’taglitho du protesto mqabıl di şultonuthathe.

Bi harayto, mşakıl şultonutho hathto b’Beljika. Calathe mu zabno du kriz di şultonutho ba 2018, mdabro Beljika me şultonutho zabnoyto. Ba guboye gawonoye dsimiwo 26 bu yarho d’İyor da 2019, lo qadiri naqla hreto a gabe folitiqoye du athro dmotın l’awyutho cal şultonutho hathto.

Alexander De Croo dmaşele a droşe du şekolo di şultonuthathe mırle bu knuşyo dsim la gelyunore; Bi qamayto mahwewo dlayto mkono dmişakıl şultonutho. A droşe grışlın zabno ğalabe yarixo, elo ucdo kiban ruşmoyith dmawdcina, dkito adyawma şultonutho dkiba dımdabro u athro.

De Croo dkıtyo 44 eşne wu meqım waziro du momuno di şultonutho zabnoyto, ucdo mbayın rişwazire du athro bıthır ma droşe dhawile camu rişono du gabo Sosyalist Paul Magnette. U rişwazire hatho mırleste; Ucdo u şwolo ulsoyo dkule, dı qudrina dmacwıdina i şultonutho hathtoyo.

İ şultonutho hathto kmişaklo me 7 gabe a liberaloye, sosyalist wa gabe du mahduro di marcitho da Flaman uda Vallon u acmayeste u gabo da Mşihoye demoqratoye da Flaman. İ şultonutho hathto d’Beljika mşaklo 493 yawme bıthır ma guboye. Elo i şultonutho da 2010 uhola 2011, grışwole 541 yawme hol dımşaklowa u bu şıkılano, sımwola rekord.