Mşawhıri a bazare dıkmibıc dımbeyni athume du yamo beyn İsroyel u d’Lebnon

Mabuco Lebnonoyo u hreno İsarloyo, mawdaclın dımşawhır u cedono da bazare dıkmisomi bayn d’Lebnon u İsroyel, bnişo dmibayni ruşmoyith athume du yamo dbaynothaye.

 Cala bazarani dıkmisomi bi qastra d’Raas Alnaqura, u mabuco Lebnonoyo maglele du gabo İsarloyo mşawharle aytawyotho cal dırfıdle arenye u hzayotho di taşdarto da bazare d’Lebnon.

Mabuco mi mşaynutho d’Lebnon u mşalo İsarloyo, bi maqırhonutho dhulın l’Reuters mawdaclın da bazare du rşomo da thume du yamo bayn d’Lebnon u İsroyel dıkmıntarwo dımdawmiwo ramhıl bi mescoyutho d’Amerika, mşawhıri lı cedono hreno dheş latyo mbayno.

U mabuco Lebnonoyo bi maqırhonuthayde mawdacle da mşale Amerikoye dhulın xabro li taşdarto d’Lebnon calu şuhoro du cedono da bazare, makadlınste dgımdawmi anesoraththe cama tıre gabe bi sbuthathe. Camgabıdathe, u mşalo İsarloyo dımakadle dımşawhıri aytawyotho da bazare cam Lebnon, mırleste dlaybe dobe mawdconutho rwıhtır cali sbuthathe. Elo u mabuco di mşaynutho d’Lebnon mırle “i celtho du şuhoro cal d’İsroyel rfıdla arenye wa hzayotho d’Lebnon yo”.

U waziro du haylo du energi d’İsroyel Yoval Ştayntz, bi maqıblonutho dsımwole acme u frosqolo du gayso İsarloyo i şabtho dşaficina, mawdacwole dbıthır marbac ytawyotho d’bazare dsimi, lımahwele dkito tarco lu şroyo di sbuthathe da thume. Ştayntz mathkarleste dıkmıtyaqın dnofıq liholo şğuşyo u terpılyotho hathe, mahweleste sabro dhowe mkono dmıhze şroyo bakmo yarhe dıbqamuthayna.

Lebnon u İsroyel mabdewolın bu yarho dı Teşrin u Qadmoyo dşaficina, aytawyotho da bazare dcalu rşomo da thume du yamo dbaynothaye. Aytawyothani mşarewolın bu knuşyo dhawiwolın atre gabe bi nuqazto da haylawotho emwothoye d’Unifel bi qastra d’Raas Alnaqura bu turo d’Lebnon.