Sim tagliyotho mqabıl du qyomo dsim cal Şigor u cala Yezidoye

Acomure di qastra d’Şigur du garbiyo du Iraq, layimi adyawma qum da qentrune da n’Asayış d’Yezidxan, bnişo dmınci ahaylawotho Iraqoye dmaydi dukthaye.

 Camgabıdathe, mtayıb bu qlimo di Gozarto d’Bethnahrin d’Suriya u bhın ma nathrawotho d’Urifi, tagılyotho du protesto mqabıl du qyomo dımde bayn da tarte şultınwotho d’Boğdod u d’Arbil cali aykanoyutho d’Şigur.

 Bıthır mu qyomo dımde bayn d’Boğdod u Arbil cali ctidutho d’Şigur, ahaylawotho Iraqoye mşadarlın folhe la fenyotho dkıtne hedor di fnitho, u mnaselın dmaydi duktho bu turo d’Şigur, elo u medano rfid ma comure di duktho dımakadlın dkıtlın i mdabronutho wa haylawotho d’ruhaye dkibın dsaymi u sutorathe.

Adyawma ba şoce d’fothıdsafro, acomure d’Şigur layimi qum da qentrune da Asayış d’Yezidxan, laşan dmahwın snodo elaye udsaymi u sutoro da qentrunathe, bu zabno dımnaselın ahaylawotho Iraqoye dmaydi dukthaye.

Bu yarho dı Teşrin u qadmoyo dşaficina, taşdarto mi qastra d’Şigur azzawo l’Boğdod u hawiwola ytawyotho cam menyono d’gabe u mşale Iraqoye, baynothaye u rişwazire Mustafa Alkazimi bnişo dmahwın i klaytathe dıkrıfdo u qyomo dımde bayne u bayn di şultonutho d’Arbil. Ubi netije da şuşote msarhıbe dhawın bi qastra d’Şigur, u mawtbo di mdabronutho yothoyto d’Şigur sımle knuşyo şnizo cali tahrazto da haylawotho Iraqoye dkıbci dmahti ido cala qentrune da haylawotho Yezidoye. Ubu tarano, u mawtbo sımle qroyto la comure d’Şigur kulle dlaymi qum da qentrune da Asayış d’Yezidxan udsaymi u sutorathe.

Athmılste bu slogan “lo lu kboşo Turkoyo, E li mdabronutho yothoyto d’Şigur” u bayto Yezidoyo di mditho d’Hlob mtayable taglitho mqabıl du qyomo dımde bayn d’Boğdod u Arbil cali aykanoyutho d’Şigur. Li taglithathe mıştawtafle ba mowat d’Yezidoye u hadome da şutose mdinoye u mathlone da gabe folitiqoye dkıtne hfite bi şawtho d’Şex Maqsud u d’Al Aşrafiya d’Hlob. U bayto Yezidoyo bu mamlo dsımle bi taglithathe, mzaharle mu qyomo dımde bayn d’Boğdod u Arbil dkibe dobe fsoso lıqtolcame hathe bhaq da Yezidoye.

Camgabıdathe, ba casrowat ma came di qastra d’Qabre Hewore bu kanton d’Qamışli bi taglitho dımtaybolın athmıl, tlıblın dmitakılyo i tahrazto bceldboboyto dkito mqabıl du kenşo Yezidoyo, udmitahwe iqoro lu camo Yezidoyo dhuwe dımbayın u dactid dı ruhe. Bebzabno, ba mowat dmıştawtaflın li taglitho dımtaybo athmıl bi qastra d’Rmelan, rfıdlın i tahrazto cjıqto dkito mqabıl da Yezidoye d’Şigur.

U ba mdinotho mşahılfotho d’Urifi, kımdawmi heş atagılyotho du protesto mqabıl du qyomo dımde bayn du Iraq wu gabo demoqratoyo d’Kurdistan di KDP cali ctidutho d’Şigur.