MSD sımle qroyto lu Huyodo Caraboyo dfoyıt li harake mqabıl d’Turkiya

 U mawtbo d’Suriya demoqratoyto d’MSD, sımle qroyto lu Huyodo Caraboyo dşofıc b’surhobo li harake, bnişo dmınfıq mqabıl di tahrazto bceldboboyto dı Turkiya i kabışto.

 MSD bu buyono dıfrısle, tlıbleste dmisım şuhlofe ba tarte taşdaryotho da bazare dcal Suriya, bnişo dmımte lu şroyo du kriz folitiqoyo du athro.

İ mathlonutho du mawtbo d’Suriya demoqratoyto d’MSD bu athro d’Mısır, bu buyono dıfrısla lu tboco frosa, grışla u zuhoro cala fusqone dmıdiwole u Huyodo Caraboyo mqabıl du kboşo du gayso Turkoyo l’arcotho b’gawıd d’Suriya i şato da 2019. U Huyodo Caraboyo meqım tarte ışne mawdacwole di bceldboyutho Turkoyto kımmathlo tehdid baroyo li mşaynutho umthoyto Caraboyto uli mşaynutho umthoyto. Mawxa ste MSD mamtele lu bolo dı Turkiya ba hçome dıksaymolın kdayşo i morutho dhın athrawotho hadome bu Huyodo Caraboyo.

İ mathlonutho d’MSD bı Mısır mawdacla ste dı Turkiya kmıstacımlo i xalyutho dkito bu Huyodo Caraboyo, laşan dımdawmo a’hçomayda cal Suriya, callathe u buyono tlıble mu Huyodo dmafıt lu yawmoyayde i mudaxala dıksaymola Turkiya ba n’athrawotho Caraboye, ud’şofıc b’surhobo li harake, bnişo dmitaklın a’hçome bceldboboye dıksaymolın Turkiya, udıkmaqşın i aykanoyutho mahişonitho d’Suriya, callathe, MSD mawdacle dıklozım an’athrawotho Caraboye u emwothoye dmahwın klayto çıddi mqabıl dı Turkiya dıksındo, dıkmasırho udkımşadro marıhbone nuxroye la n’athrawotho dkibın qrobe.

Camgabıdathe, u buyono kali cali sbutho dıklozım u mawtbo d’Suriya demoqratoyto d’MSD dmıştawtıf la bazare du maşıqlo folitiqoyo hatho d’Suriya, u mırle “u şroyo du kriz folitiqoyo d’Suriya laybe dhowe larwal du taro da fusqone dımbayniwola Emwotho Mhaydotho, ubi qadmoyuthaththe u buyono d’Çenev di şato da 2012 wu fusqono d’Emwotho Mhaydotho da 2254. Mawxa klozım dhowe şuhlofo b’gawıd du benyono du haykılo di sictho da bazare dcal Suriya awkith i taşdarto di şultonutho udi saqıbloyutho, bnişo dhıbşo b’gawa a’hayle athronoye saqıbloye d’Suriya dkıtne m’athrone, ubi qadmoyutho dkulle u mawtbo d’Suriya demoqratoyto.

Megabo hreno, MSD mzaharle mu dewam da gunhe dı Turkiya wu kboşayda dıkfıthi u darbo qum du nfoqo qawyo dı Dacış naqla hreto, u makadle ste du tukoso marıhbono kibe dımtakıs ruhe m’hathe mi celtho di şalyuthfemo dkıtle u kenşo emwothoyo mqabıl da gunhe dıksaymolın Turkiya bhaq du camo d’Suriya.