U Mawtbo di Mdabronutho Yothoyto d’Şigur sımle u duxrono du qtolcamo d’Kojo

U mawtbo di mdabronutho yothoyto demoqratoyto d’Şigur du garbiyo du Iraq, hule şudoyo dgıdmoyıd hşowo ma more di mşalutho dcalu qtolcamo dhawiwo b’Şigur i şato da 2014.

Bu buyono dıfrısle u mawtbo di mdabronutho yothoyto d’Şigur, mawdacle dlıgıdobe mucdo wazolo aftho l’noşo d’gonu u sebyono da Yezidoye.

Bi cohnutho du yawmo şatonoyo du qtolcamo di qritho d’Kojo d’Şigur, u mawtbo di mdabronutho yothoyto demoqratoyto d’Şigur, frısle buyono lu ray gawonoyo dıbritho. Bu buyonayde, u mawtbo komır “ba yawme casqe u mahişone ducdo, kmathkırina a’sohde du qtolcamo da Yezidoye dilonoyith a’sohde di qritho d’Kojo, ukımqadmina a’buyoyaydan la yaqrotho kulle da sohde du kenşo Yezidoyo. Camıhbol ba yawmani mcafe 104 şlade d’sohde, elo i ctidutho d’mowat d’şlade da sohde Yezidoye heş latyo idıcto”.

La farsufe dhulın maqırhınwotho bu zawho du cufyo da 104 sohde di qritho d’Kojo, u mawtbo di mdabronutho d’Şigur hawxa mşayele “a’farsufani aykowın bu siqumo d’15 bu yarho d’Ob i şato da 2014 u mın ksaymiwo?. Qay lımsik ulo farsufo dkıtwole sawco bu zebono d’Şigur, u noşo ste lımqadım lu bethdino?. Camıhbol hani dkıtwın celtho da qtolcamani, ucdo yatiwene ba woliyothaththe, ukıbci dımkasın calu haşo ucalu qtolcamo dhawi bhaq da Yezidoye d’Şigur xıd mede dlawi”.

Camgabıdathe, u buyono grışle u zuhoro cal idotho baroye ğalabe dkıbci dsaymi mudaxala ba sebwotho gawoye d’Şigur, dsaymi u mede dsımwole Dacış meqım, dkıbşi u cafro da Yezidoye udsaymi qtolcame hathe bhaq dıththe. U buyono ba melani mdawamle “mu şuroyo du qtolcamo da 2014 uhul ucdo, ahna kobina sohde laşan i hirutho da Yezidoye wu sebyonaththe. Ahna lıgıdobina fsoso du admo da sohdaydan dızzeyo lu xalyo, gıdmaydina hşowo mkulle dkıtwın celtho du qtolcamo da 2014, ugıdobina ağuno mqabıl dkul hçomo dgıdhowe cala Yezidoye”.