Mtayıb dawra yulfonoyto du syomo di halyutho la neşe bi daşto d’Ninwe

Bi mditho Suryoyto d’Barıtle di daşto d’Ninwe, mtayıb dawra yulfonoyto du syomo di halyutho la neşe di daşto.

İ dawrathe mtaybo mi mtakasto İtaloyto d’UPP, bnişo dmiqafe gade du fulhono la neşe da came mşahılfe di daşto d’Ninwe.

İ mtakasto İtaloyto d’UPP ubu taro di tarmithayda d’camıhdode lu şlomo, mtayabla dawra da duroşe awkith work shop du tewlifo du syomo d’şıklat mşahılfe di halyutho. İ dawrathe dımtaybo yawme dı tre dşaficina bi mditho Suryoyto d’Barıtle, mıştawtaflela menyono d’neşe ma came mşahılfe di daşto d’Ninwe bi mdabronutho di malfonitho Farah Bulıs.

U nişo di dawrathe, dmitawlıfi a’neşe aydarbo kibın dımtaybi halyutho b’darbone fşite, laşan dqıdri dımşawşıti ruhaye bu haqlano udımqafın elaye gade du fulhono.

İ mdabronitho du work shop Farah Bulıs dkıtyo bebzabno morıd dı dukano di halyutho bı Barıtle, bi maqırhonutho dhula lu tboco froso mırla “u nişo di dawrathe dgımdawmo tlotho yawme, dmitaqwın a’mawhabyotho da neşe bu haqlo du syomo di halyutho uda pastat mşahılfe, ubu şıklano kibe dmıftıh b’qamuthaye darbone bi şuqo du fulhono, dmitaqwiyo i ruho di methcadronutho bayn da neşe di daşto d’Ninwe, udmıstafdi ma zabne di xalyuthaththe bnişo dhowelın dawro msimono b’gawıd du kenşo”.

Raşa Mwaffaq dkıtyo hdo ma neşe dmıştawtaflın li dawrathe mırla “kmahwena yasifutho li dawrathe, laşan dyulfina a’şıklat mşahılfe u dilonoye di halyutho uda pastat, udmaydina mawdcınwotho cala marduwotho mşahılfe du kenşaydan di daşto d’Ninwe”.

Rand Xalıd ste dkıtyo mi qastra d’Bacşiqa, bi amqırhonutho dhula lu tboco froso, mqadamla a’tawdiyothayda li mtakasto İtaloyto d’UPP, cala fulhone dıksaymolın du tenhiro du kenşo di daşto d’Ninwe, dilonoyith a’tarmiyotho dıksaymolın la neşe bnişo dhowela i athto u momuno yothoyo d’ruha.

Meqım matheste, i mtakasto İtaloyto mtayabwola dawrat ğalabe la neşe di daşto d’Ninwe, baynothaye du tewlifo da şuğlone di ido, musiqi, rşomo, dawrat du teşfiro da neşe, di gelyenorutho, di mdabronutho da fulhone udu kompyutır u ğer.