İ Scudiye tlıbla dmitawrıx u embargo da zayne dcalu İran

U Mawtbo da wazire di Scudiye tlıble dmitawrıx u embargo da zayne dcalu İran, bıthır mıd zayidi a hçome da Houthiye d’Yemen.

Bebzabno i Scudiye, b’qaşyutho krıhla u hçomo dsımlın a mtagliyone calu qusro di rişqutnutho d’Yemen.

Bu knuşyo dsımle athmıl u Mawtbo da wazire di Scudiye-bi mıştawtıfonutho du malko bin Salman bu darbo du video konferans, tlıble dmitawrıx u zabno du embargo da zayne lu İran, bıthır mıd zayidi a hçome da soruhe uda tayosyotho dlo pilote da Houthiye cala dukotho da mdinoye b’Yemen. A Houthiye d’Yemen, kmısnodi mu İran dıkmşadarlın kull zabno zayne İranoye.

Bi maqırhonutho dqıryo bu knuşyano, u Mawtbo da wazire mırle; Kalina cali ulsoyutho du tewrixo du embargo da zayne calu İran, cal dheş kımdawım dımşadır zayne mşawşıte la marhıbone da Houthiye d’Yemen. A hçomani hem sistematik’ne u kmisomi leşan dmitahwe husrono lu kenşo.

U Mawtbo da wazire mırle’ste; İ Scudiye kısundo a fulhone Emwothoye dıkmisomi bnişo dım’akdi du İran dlowe moro d’zayne nukleer u dhowele soruhe ballistik. Belhude bu şıkılano kibe u Xaliç Caraboyo dnodıf ma zayne yaqure dkito, u dmitahwe iqoro li şaryutho dan athrawotho du qlimo. Cali sbuthathe d’Yemen, i Scudiye krıhla’ste u hçomo dsımlın athmıl a mtagliyone calu qusro di rişqutnutho d’Yemen.

Mawdıc da mtagliyone hçımlın ba kefe calu qusro d’al Maşıq b’Aden u krıhlın i aykanoyutho harıwto du momuno b’Yemen. İ Scudiye kısundo i şultonutho dımşaklo bi rişonutho du rişwazire Maeen Abdulmalikk Sacıd u dmitahwela aftho u gado, dşuryo u kriz momunoyo du athro. İ Scudiye tlıbla ma 2 gabe du qyomo d’Riyad dfulhi leşan dımtabqi u qyomano bnişo dmitakle u qrobo u dmicadlo i aykanoyutho di ciyeşe du camo d’Yemen.