Mtayıb knuşyo rwiho cali mdabronutho yothoyto du garbiyo udu madınho d’Suriya b’Cenev bu athro d’Swisra

Adyawma bi mditho d’Cenev bu athro d’Swisra, mtayıb knuşyo rwiho calu nesyuno di mdabronutho yothoyto du garbiyo udu madınho d’Suriya.

Bu knuşyano dıdrişıste ebe u mkono dmisım bethdino dı Dacış, mıştawtaflele mşale folhoye u folitiqoye dkımmathli u camaydan u Suryoyo b’gawıd di mdabronutho yothoyto.

İ mditho d’Cenev bu athro d’Swisra, sımla adyawma baytoyutho l’knuşyo rwiho cali mdabronutho yothoyto du garbiyo udu madınho d’Suriya. Bu knuşyano dgımdawım tre yawme, kmıdroşo i aykanoyutho ducdo da fenyotho du garbiyo udu madınho d’Suriya, u nesyuno di mdabronutho yothoyto u aydarbo kibe dmınfıq moro li mdabronuthathe udmişawşıto wu dactid di fnitho.

Bebzabno, ba ytawyothani d’Çenev gıdmıdroşi a’darbone du şroyo folitiqoyo du kriz admonoyo d’Suriya, elo mbayn da sebwotho ulsoye dgıdmıdroşi ba ytawyothani i sbutho da marıhbone dı Dacış dkıtne ba hbuşye da haylawotho d’Suriya demoqratoyto d’QASAD, udmisamlın bethdino.

La ytawyothani kmıştawtıfo taşdarto mu garbiyo umu madınho d’Suriya dıkmişaklo mu malolo da haylawotho d’Suriya demoqratoyto d’QASAD Kino Gabriel,  i rişonitho zawgoyto du mawtbo mşablono du qlimo di Gozarto Nazira Gawriye dkıtyo bebzabno hadımto bi sictho di rişonutho du gabo du Huyodo Suryoyo d’GHS, i rişonitho zawgoyto du mawtbo mşablono du garbiyo udu madınho d’Suriya Perivan Xaled, u mcadrono di rişonutho zawgoyto du mawtbo mşablono du garbiyo udu madınho d’Suriya Badran Jiya, u mcadrono di rişonutho zawgoyto di dayira da n’esore baroye du garbiyo udu madınho d’Suriya Fenar Allıgcet wu rişono du qentrun d’Suriya da buhone udu diyalog Naser Haj Mansur.